MANILA, Philippines- Nagbabadya ang mas mataas na singil ng power distributor na Manila Electric Co. (Meralco) ngayong buwan dahil sa posibleng pagtaas sa generation at transmission charges.
Sinabi ni Joe Zaldarriaga, Meralco vice president at head of corporate communications, nitong Martes na inaasahan ng kompanya ang mas mataas na presyo sa Wholesale Electricity Spot Market (WESM) “due to the tight supply situation in the last supply month.”
Aniya, lumabas sa inisyal na datos ang pagtaas ng average power demand na tatama sa mahigit 1,000 megawatts (MW). Ang average capacity ng outage ay halos 1,000 MW.
Naiimpluwensyahan naman ang generation charge ng Meralco, karaniwang katumbas ng mahigit 50 porsyento ng monthly power bill, ng presyo mula sa WESM, independent power producers at power supply agreements.
“In addition, higher ancillary service charges due to higher Reserve Market Prices will likely drive [up] transmission charges in the April billing,” wika ni Zaldarriaga.
“We hope that the start of the implementation of the refund approved by the [Energy Regulatory Commission] will help mitigate these possible increases in these bill components. This is equivalent to around 20 centavos per kWh downward adjustment for residential customers starting this month,” dagdag ng opisyal. RNT/SA
