MANILA, Philippines – Inirekomenda ni Department of Public Works and Highways (DPWH) Secretary Vince Dizon ang isang third-party assessment sa Estero de Sunog Apog pumping station sa Gagalangin, Tondo na binatikos dahil sa pagiging “constantly broken”.
Binanggit niya na ang pasilidad sa Hermosa Street, na nagkakahalaga ng mahigit PHP774 milyon, ay bahagi ng flood control project ng DPWH para maiwasan ang pagbaha sa mga mabababang lugar ng Maynila tulad ng España Boulevard, Sampaloc District, Rizal Avenue, at Maria Clara Street.
Sa panahon ng inspeksyon, napag-alaman na walang independiyenteng third-party na pagtatasa ang ginawa sa proyekto mula noong natapos ito noong 2020 at sa kabila ng paulit-ulit na pag-aayos halos bawat taon.
Nag-inspeksyon si Dizon, kasama sina Manila Mayor Isko Moreno at Baguio City Mayor at Independent Commission for Infrastructure (ICI) Special Adviser Benjamin Magalong, sa pasilidad noong Setyembre 24.
Sinimulan ang pumping station noong 2018 at natapos noong 2020, ngunit sinabi ni Dizon, sa pagbanggit ng mga kuwento ng mga residente, hindi ito gumana gaya ng inaasahan at nakadagdag lamang sa problema ng pagbaha sa lugar.
Binanggit din ni Dizon na bagama’t sinasabi ng contractor na saklaw ng warranty ang kasalukuyang pag-aayos, may dokumentong nagpapakita na mayroong bagong pondo na nagkakahalaga ng P94 milyon na ilalabas ng gobyerno para sa karagdagang pagkukumpuni —isang bagay na tinawag niyang “wrong system.”
Inatasan niya ang DPWH National Capital Region na makipag-ugnayan sa Metropolitan Manila Development Authority sa halip na paulit-ulit itong ayusin, na aniya ay kumakain ng milyun-milyong pondo ng gobyerno. Jocelyn Tabangcura-Domenden
