CAUAYAN CITY, Isabela – Naaresto ng mga awtoridad ang Top 3 Most Wanted Person sa region 2 sa kasong murder o pagpatay sa Cauayan City, Isabela.
Sa pinaigting na anti-criminality campaign ni PLtCol. Avel8no Canceran Jr., hepe ng Cauayan Component City Police Station, kinilala ang suspek na si alyas ‘Fino’, 46-anyos, tricycle driver at residente ng Brgy. Villa Flor, Cauayan City.
Siya ay dinakip na bisa ng warrant of arrest na inilabas ng RTC Branch 40, Cauayan City, Isabela, na walang inirekomendang piyansa.
Pansamantala nasa kustodiya na ng Cauayan Component City Police Station ang suspek at nakatakdang i-turn over sa korte na naglabas ng warrant.
Ang matagumpay na pagkakahuli ni alyas ‘Fino’ ay bunga ng pinagsanib na pwersa ng Cauayan Component City Police Station bilang lead unit, katuwang ang Provincial Investigation Detection and Management Unit at Provincial Intelligence Unit ng Isabela Police Provincial Office, Regional Intelligence Unit 2-Provincial Intelligence Team, Regional Maritime Unit 2 at ng 2nd Isabela Provincial Mobile Force Company. (REY VELASCO)
