MANILA, Philippines – Ayon sa Philippine, Atmospheric, Geophysical, and Astronomical Services Administration (PAGASA), ang Bagyong Emong ay maaaring mag-landfall o dumaan nang napakalapit sa kanluran ng Pangasinan sa susunod na 3 oras. Posible ang isa pang landfall sa La Union o Ilocos Sur sa huling bahagi ng Huwebes o unang bahagi ng Biyernes.
Nananatiling may bisa ang Wind Signal No. 4 sa timog-kanluran ng Ilocos Sur, hilagang-kanluran ng La Union, at hilagang-kanluran ng Pangasinan.
Ang mga lugar na ito ay maaaring makaranas ng napakalakas na hangin na maaaring magputol ng mga puno at poste, magpunit o magtanggal ng mga bubong, at magdulot ng malaking pinsala sa mga bahay.
Natatagpuan ang Bagyong Emong sa baybayin ng Burgos, Pangasinan, alas-7 ng gabi, Huwebes. Taglay nito ang hanging 120 kph na may pagbugsong aabot sa 165 kph at dahan-dahang kumikilos pa-silangan.
Tatawid si Emong sa bulubunduking kalupaan ng Hilagang Luzon at magsisimula ng humina habang binabaybay ang hilagang-silangan. Maaaring lumabas ito sa Philippine area of responsibility (PAR) sa Sabado. RNT/MND
