MANILA, Philippines – Bumisita ang mga kinatawan ng United States Embassy sa 2nd Infantry Division (2ID) medical facility ng Philippine Army upang suriin ang kalagayan ni American activist Chantal Anicoche, kasunod ng alegasyon mula sa mga human rights groups na siya ay hawak sa ilalim ng panggigipit.
Ayon kay 2ID spokesperson Colonel Michael Aquino, boluntaryo ang pananatili ni Anicoche sa 2ID Station Hospital at may written undertaking siya na nagpapahayag ng kanyang kagustuhan na ma-admit sa pasilidad nang walang pamimilit.
“Here in 2ID, we honor that undertaking because the Army is always on the side of human rights. We put primacy on the rights of a person,” ani Aquino.
Dismayado si Aquino sa alegasyon ng mga karapatang pantao, na tinanggihan naman ng embahada at nakatala sa dokumento na ginawa sa harap ng isang independent lawyer mula sa Integrated Bar of the Philippines (IBP).
Ipinakita rin ang mga larawan ng kondisyon ni Anicoche, na hindi nagpapakita ng pamimilit.
Naulat na si Anicoche ay walang pagkain at tubig sa loob ng walong araw bago siya matagpuan matapos ang engkwentro ng gobyerno at umano’y New People’s Army (NPA) members noong Enero 1 sa Abra de Ilog, Occidental Mindoro.
Bagaman siya ay person of interest, ayon kay Aquino, hindi nito nililimitahan ang kanyang kalayaan.
Patuloy namang hinahanap ng Army ang kanyang mga kasamahan, na pinaniniwalaang higit sa sampung estudyante, habang nagpapatuloy ang imbestigasyon sa engkwentro.
Ayon kay AFP spokesperson Colonel Francel Margareth Padilla, ang operasyon sa Abra de Ilog ay naglalayong panatilihin ang seguridad ng lokal na komunidad at pigilan ang muling pag-usbong ng armadong grupo.
Mariing itinanggi ng AFP ang alegasyon mula sa mga grupong Kabataan, Karapatan, at Migrante, at hinamon silang magsagawa ng kanilang sariling makatarungang imbestigasyon.
Binanggit din ni Padilla ang tanong kung bakit naroroon sa conflict zone ang isang US citizen, at hinikayat ang mga magulang, guro, at lider ng komunidad na maging aktibo sa pagsasanggalang sa kabataan. RNT/MND
