MANILA, Philippines – Ikinonsidera ni Senator Vicente Sotto III ang posibilidad na idulog sa Supreme Court of the Philippines ang isyu ng online participation sa mga proceedings ng Senado kung mabigo ang minority bloc na mapigilan ito sa loob ng chamber.
Ayon kay Sotto, “If we are not able to stop it,” maaaring umabot sa Korte Suprema ang kontrobersiya matapos ang banggaan ng mga senador hinggil sa panukalang payagan ang remote participation sa sesyon.
Naganap ang tensyon matapos itulak ng majority bloc sa pamumuno ni Senate President Alan Peter Cayetano ang mosyon ni Rodante Marcoleta na payagan ang online voting ng mga senador.
Nag-walkout ang minority bloc bilang pagtutol, habang iginiit nila na dapat sundin ang proseso ng Senado at ipasa muna ang usapin sa committee on rules.
Ayon kay Sotto, dapat ay hindi binabago ang rules para umano paboran ang ilang personalidad, kabilang si Ronald dela Rosa na nahaharap sa mga isyu kaugnay ng posibleng pag-aresto ng International Criminal Court (ICC).
Ikinonekta rin ang isyu sa iba pang mga senador na maaaring maharap sa kasong plunder, kabilang sina Jinggoy Estrada at Joel Villanueva.
Samantala, nagbigay naman ng pahayag si Panfilo Lacson na nagsabing ang pag-atras ng minority ay maaaring maging estratehiya sa gitna ng alitan sa rules, at iginiit na mahalaga ang pagsunod sa mga patakaran ng Senado.
Patuloy ang mainit na debate sa loob ng Senado habang hinihintay kung hanggang saan aabot ang usapin ng online participation sa mga susunod na araw. RNT/MND
