MANILA, Philippines – Sinabi ni Vice President Sara Duterte, desidido si dating Pangulong Rodrigo Duterte na huwag palitan ang kanyang legal team na humahawak sa kanyang kaso sa International Criminal Court (ICC).
Habang bumibisita sa kanyang ama sa The Hague, ini-relay ni VP Sara ang mga alalahanin ng mga tagasuporta na hindi nasisiyahan sa takbo ng depensa.
Tugon ni Duterte: “Hindi palitan.”
Sinabi rin ni VP Sara na may ibinigay na mga instructions ang kanyang ama sa kanyang mga abogado, ngunit hindi niya ibinahagi ang detalye dahil hindi ito gaanong mahalaga.
Si Duterte ay nakakulong sa The Hague matapos maaresto sa bisa ng warrant mula sa ICC dahil sa kasong crimes against humanity kaugnay ng umano’y extrajudicial killings sa panahon ng kanyang administrasyong kontra-droga.
Ipinahayag ng ICC Pre-Trial Chamber 1 na may kakayahan si Duterte na lumahok sa pre-trial proceedings at itinakda ang confirmation of charges sa Pebrero 23, 2026, kahit na humiling ang depensa ng indefinite adjournment.
Ayon kay Atty. Nicholas Kaufman, lead counsel ni Duterte, plano nilang i-apela ang desisyon at nagdismaya sila na hindi pinayagang isumite ang kanilang sariling medikal na ebidensya. RNT
