MANILA, Philippines – Sinabi ni Vice President Sara Duterte na inaasahan niyang tatapyasan ang proposed P903 milyong badyet ng Office of the Vice President para sa 2026 sa oras na maipasa ang General Appropriations Act.
“Hindi naman nagbago ang administration eh. ‘Yan pa rin ang Pangulo natin, ‘yan pa rin ang Speaker of the House of Representatives natin. So wala na tayong ma-expect na ibibigay para sa Office of the Vice President,” sinabi ni Duterte sa isang ambush interview.
“So kung ano ‘yung in-approve ng Department of Budget and Management, ‘yun din ‘yung submit namin, ‘yan din ‘yung nilagay sa NEP (National Expenditure Program). And of course ang expectation natin is bababaan ‘yan pagdating sa House of Representatives,” dagdag pa niya.
Wala pang tugon si Nueva Ecija Rep. Mikaela Suansing, na siyang chairperson ng House Committee on Appropriations, kaugnay ng sinabi ni Duterte.
Matatandaan na noong nakaraang taon ay nagdesisyon ang Kamara na bawasan ang badyet ng OVP mula sa orihinal na proposed P2 bilyon ay ginawang P733 milyon dahil sa pagtanggi ni Duterte na sumagot sa mga tanong ng mga mambabatas kung saan gagamitin ang pera kabilang ang confidential funds. RNT/JGC
