MANILA, Philippines – Pinaigting ng pamahalaan ang laban kontra agricultural smuggling sa pamamagitan ng Tripartite Memorandum of Agreement (MOA) ng Department of Justice (DOJ), Bureau of Customs (BOC), at National Bureau of Investigation (NBI).
Nilagdaan nina Justice Secretary Atty. Fredderick A. Vida, BOC Commissioner Ariel F. Nepomuceno at NBI Director Atty. Melvin A. Matibag ang kasunduan para palakasin ang imbestigasyon at pag-uusig sa mga sangkot sa agricultural smuggling, hoarding, profiteering at kartel na nakaaapekto sa kabuhayan ng magsasaka at mangingisda, food security at kapakanan ng mamimili.
Layunin ng partnership na mapalakas ang information at intelligence sharing, criminal investigation, case build-up, evidence evaluation, referral, preliminary investigation, prosecution at enforcement coordination sa ilalim ng Republic Act No. 12022 o Anti-Agricultural Economic Sabotage Act.
Magtatatag din ng Technical Working Group (TWG) upang bumuo ng coordination guidelines, referral mechanisms, information-sharing protocols at iba pang hakbang para sa tuloy-tuloy na implementasyon ng kasunduan.
Ayon kay Nepomuceno, pagsasamahin ng partnership ang enforcement, investigative at legal expertise ng tatlong ahensya.
Sa ilalim ng kanyang pamumuno, 15 reklamo na kinasasangkutan ng 20 respondents ang nai-endorso na ng BOC sa DOJ dahil sa paglabag sa RA 12022. Mula 2025, nakapagsampa rin ang BOC ng 30 kasong may kaugnayan sa agricultural products sa ilalim ng Customs Modernization and Tariff Act (CMTA), na kinasasangkutan ng 127 respondents.
Dumalo rin si Ombudsman Jesus Crispin “Boying” Remulla at nagpahayag ng suporta sa partnership na naglalayong tiyaking masusing imbestigasyon at epektibong pag-uusig sa mga sangkot sa agricultural economic sabotage. Jocelyn Tabangcura-Domenden
