MANILA, Philippines – Suspendido ang klase at trabaho sa mga bayan ng Kalamansig at Lebak sa lalawigan ng Sultan Kudarat simula Miyerkules, Enero 28, 2026, dahil sa sunod-sunod na lindol at posibleng mga aftershock, ayon kay Gobernador Datu Pax Ali Mangudadatu.
Sa isang social media post at advisory, sinabi ng gobernador na saklaw ng suspensiyon ang trabaho at klase sa lahat ng antas, kapwa sa pampubliko at pribadong institusyon, at mananatili ito hanggang sa susunod na abiso “to ensure the safety of everyone.”
“Residents of both municipalities are advised to remain alert, avoid staying in damaged or unstable structures, and prepare for possible aftershocks,” ayon sa advisory.
“Please follow official advisories from the Provincial Government and local DRRM offices for updates,” dagdag nito.
Ayon kay Mangudadatu, maglalabas ang lokal na pamahalaan ng isang executive order upang pormal na ipatupad ang direktiba. Mary Ann Sapico
