MANILA, Philippines – Ipinagbawal muna sa bansa ang pagpasok ng mga buhay na kambing mula Estados Unidos matapos na magpositibo sa human-transmissible Q fever ang ilang imported na kambing mula sa nasabing bansa.
Sa Memorandum Order No. 26 na inisyu noong Hunyo 20, ipinagbawal ni Agriculture Secretary Francisco Tiu Laurel Jr. ang importasyon ng buhay na kambing mula sa US.
Binanggit ni Tiu Laurel ang pagpopositibo sa Q fever ng mga inimport kamakailan na buhay na kambing mula sa US.
Ayon sa Department of Agriculture-Bureau of Animal Industry (DA-BAI), sa 94 na kambing na dumating sa bansa, 19 samples ang nagpositibo sa Q fever.
“There is neither effective treatment nor vaccination available in the country for the animals; thus, there is a need to institute radical measures to contain the spread of this outbreak to protect the local ruminant industry and the health of the general public,” ayon kay Tiu Laurel.
Ipinag-utos din ng agriculture chief ang agarang suspensyon sa pagproseso, evaluation ng aplikasyon at pagbibigay ng sanitary and phytosanitary import clearance (SPSIC) para sa mga kambing na mula US.
“All approved yet unused SPSIC for goats coming from the USA are deemed cancelled upon the issuance of this memorandum,” aniya.
Ang mga goat shipment naman na mula US na in transit, ikinarga o tinanggap sa mga port bago ang opisyal na paglalabas ng kautusan ay papayagan “subject to quarantine rules and testing requirements.” RNT/JGC
