MANILA, Philippines – Nadakip na ng pulisya ang 63-anyos na lolo na wanted sa kaso ng pagpatay makalipas ang halos 34 taon na pagtatago sa Valenzuela City.
Sa ulat ng tanggapan ni Northern Police District (NPD) Acting Director P/BGen. Benliner capili, ang akusado ay isang caregiver na residente ng Brgy., Malinta ng lungsod at kabilang umano sa talaan ng mga Most Wanted Persons ng Valenzuela City Police Station.
Kasalukuyang nakapiit ang akusado sa Custodial Facility Unit ng Valenzuela CPS matapos maaresto sa hindi nabanggit na kaso.
Nang magsagawa ng pagsisiyasat ang mga tauhan ni Valenzuela Police Chief P/Col. Joseph Talento, natuklasan ng mga ito na may nakabinbin na warrant of arrest ang akusado para sa kasong Murder na inisyu ng Regional Trial Court, Branch 171 ng Valenzuela City, na may petsang September 8, 1992.
Kaagad namang isinilbi ng mga operatiba ng Warrant and Subpoena Section (WSS) sa akusado sa loob ng nasabing facility ang naturang warrant na walang inirekomendang piyansa sa sa kanyang pansamantalang paglaya. (Merly Duero)
