MANILA, Philippines – Nasa 43% ng mga Filipino ang pabor sa pakikipag-ugnayan ng Pilipinas sa US sa nagpapatuloy na gusot sa South China Sea.
Ito ang resulta sa survey ng Oculum Research and Analytics kung saan 3,000 Filipino adults ang lumahok sa survey na isinagawa mula Pebrero 21 hanggang Pebrero 29, 2024 sa pamamagitan ng face-to-face interviews.
Mayroon itong sampling error margin na ± 2 at high confidence level sa 97%.
Ayon sa poll, tanging 3% lamang ng respondents ang nagsabi na dapat umayon ang Pilipinas sa China sa territorial dispute.
Nasa kabuuang 40% ang nais na ibang bansa bukod sa US at Beijing ang makasama ng bansa, habang 15% ang hindi sigurado.
“The survey results regarding the preferred alignment of the Philippines in the context of the South China Sea dispute offer a revealing glimpse into public opinion on this significant international issue,” sinabi ni Dr. Joseph Mercado, Oculum Research and Analytics chief statistician.
Lumabas din sa survey na ang US ang pinaka-pinagkakatiwalaan ng mga Filipino sa 75% trust rating. Sinundan ito ng Canada sa 69%; Australia, 65%; Japan, 59%; at UK sa 58%.
Nakatanggap naman ng pinakamababang trust rating na 17% at highest distrust rating na 38% ang China.
“The low level of trust in China and a relatively high level of distrust could be attributed to geopolitical tensions, economic competition, territorial disputes, or concerns over political and human rights issues,” ani Mercado. RNT/JGC
