5 patay, 87 nawawala sa nasunog na barko sa Coron; 42 nasagip

MANILA, Philippines — Lima ang naiulat na nasawi habang 87 ang hindi pa natatagpuan matapos masunog ang pampasaherong barkong MV Jun Aster sa karagatang sakop ng Coron, Palawan nitong Miyerkoles ng gabi.

Ayon sa Philippine Coast Guard (PCG), 42 katao, kung saan 38 pasahero at apat na tripulante, ang nasagip habang nagpapatuloy ang search and rescue operations. Nilinaw nitong maaari pang magbago ang bilang habang nagpapatuloy ang operasyon.

Batay sa manifesto ng barko, may sakay na 117 pasahero at 17 tripulante o kabuuang 134 katao ang barko.

Nagmula sa Baseco area sa Maynila ang MV Jun Aster at patungo sana sa Coron nang lamunin ng apoy bandang alas-6:45 ng gabi.

Nangyari ang insidente sa karagatang may 1.2 nautical miles hilagang-silangan ng Barangay Marcilla sa Coron.

Nakipag-ugnayan ang PCG sa Bureau of Fire Protection, Municipal Disaster Risk Reduction and Management Office, lokal na pamahalaan ng Coron at mga shipping line upang magsagawa ng agarang rescue operation.

Nagpadala rin ng mga tauhan ang Coast Guard Special Operations Group at Maritime Environmental Protection Unit-Northeastern Palawan. Tumulak naman mula El Nido ang BRP Suluan upang tumulong sa operasyon.

Patuloy pang inaalam ng mga awtoridad ang sanhi ng sunog. Mary Anne Sapico