INIHAYAG ni President Ferdinand “BBM” Marcos, Jr., ang inisyal na ulat mula sa awdit na kanyang ipinag-utos sa mga na-implementang flood control project sa nakalipas na tatlong taon. Ang resulta, labinlimang piling kontratista ang nakakuha ng halos ikalimang bahagi ng kabuuang pondo para sa mga proyekto kaugnay sa baha.
Ibinunyag ni Pangulong BBM na mula nang siya ay maupo sa puwesto, kabuuang 9,855 flood control projects na may halagang humigit-kumulang Php 545 billion ang naipatupad sa buong bansa. Sa unang tingin, tila pantay-pantay ang distribusyon ng pondo dahil may 2,409 kontratista ang naitala. Ngunit nang siyasatin ang datos, lumabas na 15 lamang sa kanila ang kumubra ng 20 porsyento ng kabuuang pondo, katumbas ng halos Php 100 billion. Ang natitirang Php 436 billion ay pinaghati-hatian ng 2,394 na kontratista.
Pinangalanan mismo ng Pangulo ang 15 kompanyang nakakuha ng pinakamalaking bahagi ng proyekto, at ito ang:
1. Legacy Construction Corporation;
2. Alpha & Omega General Contractor & Development Corporation;
3. St. Timothy Construction Corporation;
4. QM Builders;
5. EGB Construction Corporation;
6. Topnotch Catalyst Builders Incorporated;
7. Centerways Construction and Development Incorporated;
8. Sunwest Incorporated;
9. Hi-Tone Construction & Development Corporation;
10. Triple 8 Construction & Supply Incorporated;
11. Royal Crown Monarch Construction & Supplies Corporation;
12. Wawao Builders;
13. MG Samidan Construction;
14. L.R. Tiqui Builders Incorporated; at
15. Road Edge Trading & Development Services
Lima sa mga kompanyang ito, ang Legacy Construction, Alpha & Omega General Contractor & Development, St. Timothy Construction, EGB Construction, at Road Edge Trading & Development Services, ay may proyekto sa halos lahat ng rehiyon sa bansa.
Partikular na tinutukan ang St. Timothy Construction Corporation, na umatras kamakailan mula sa joint venture, kasama ang Commission on Elections (COMELEC) para sa pagbibigay ng election systems sa 2025 midterm polls.
Ayon sa mga ulat, ito umano ay kapareho ng St. Gerrard Construction, isang kompanyang matagal nang kontrobersyal at pagmamay-ari ng natalong kandidato sa pagka-alkalde ng Pasig city na si Sarah Discaya.
Bagama’t inilabas ni Pangulong BBM ang listahan, nilinaw niya na “hindi pa siya nagtuturo ng may kasalanan” at ang layunin ay masuri pa nang mas malalim ang distribusyon ng pondo.
Ipinakita rin ng Pangulo ang datus mula sa Department of Public Works and Highways (DPWH) at National Adaptation Plan (NAP) 2023 – 2025 na nagpapakitang hindi magkatugma ang mga lugar na pinaka-bahaing probinsya at ang nakatanggap ng pinakamaraming flood control projects.
Base sa DPWH data, pinakamaraming flood control projects sa mga lalawigan ng:
* Bulacan – 668
* Cebu – 414
* Isabela – 341
* Pangasinan – 313
* Pampanga – 292
* Albay – 273
* Leyte – 262
* Tarlac – 258
* Camarines Sur – 252
* Ilocos Norte – 224
