Alyansa bets pumalag sa batikos sa P20/kg na bigas ni PBBM

DAGUPAN CITY — Dinepensahan ng mga senatorial bets ng Alyansa Para sa Bagong Pilipinas ang naging “timing” ng P20 rice rollout sa Visayas na ipinatupad ng Marcos administration sa pagsasabing hind ito pamumulitika.

Giit ng mga alyansa bets, alam ng lahat ang pangako ni Pangulong Bongbong Marcos na P20 na kilo ng bigas kaya hindi nakakabigla na makalipas ang 3 taon sa panunungkulan ay nasimulan na ito.

“Ganoon talaga. Whatever timing it is, kahit last year pa ‘yan, sasabihin konektado sa eleksyon,” pahayag ni dating Senate President Vicente “Tito” Sotto III sa pressconference ng Alyansa bago ang kanilang campaign rally sa CSI Stadia sa Dagupan, Pangasinan.

“You will never be able to please everyone. The important thing is you do what is right—and do it. Ganoon. For the benefit of the people, whether there is an election or not.” depensa pa ni Sotto.

Para naman kay Makati Mayor Abby Binay hindi na dapat pagdudahan ang ginawang rollout dahil wala namang tamang “timing” sa ganitong mga programa, kung kayang gawin, panahon man ng eleksyon o hindi ay kagyat na ipatupad para sa kapakanan ng taumbayan.

“Sasabihin mo ba sa mga tao, after the election na lang ako magbibigay ng murang bigas kasi sasabihin na namumulitika ako? Hindi naman ho ganoon ang trabaho ng gobyerno,” qni Binay.

“Kung maibibigay mo na ngayon, ibigay mo na. Hindi mo pwedeng sabihin na maghihintay ako ng magandang timing. Tumutulong na ‘yung gobyerno, pinipintasan pa rin. Saan ba tayo lulugar? Ang hirap ng posisyon na ‘to,” giit pa ni Binay.

Sinabi naman ni dating Senator Panfilo “Ping” Lacson na walang ” too late” kapag tulong ng gobyerno ang pinag uusapan.

“Kapag tinutulungan mo ‘yung mahihirap at gutom, nothing is too late, nothing is too little” paliwanag ni Lacson.

Hindi naman dapat batikusin si Pangulong Marcos sa ipinatupad na roll out ayon kay dating Interior and Local Government Secretary Benhur Abalos, aniya, dapat pa ngang purihin ang administrasyon dahil ginagawa nito ang pangako na mababang presyon ng bigas.

Sa panig ni ACT-CIS Party-list Rep. Erwin Tulfo sinabi nito na ngayong naumpisahan na ang pagpapatupad ng P20 rice rollout ang dapat na sunud na gawin ay rebyuhin na ang
Rice Tariffication Law (RTL) para masiguro na tuloy tuloy na ang abot kayang presyo ng bigas sa merkado.

“Matagal nang naniningil ang taongbayan. Pinag-aralan ito noong ako pa’y nasa Gabinete. Ngayon na naisakatuparan, may nagsasabi pa ningas-kugon. The best way to sustain this is to review the RTL,”pagtatapos pa ni Tulfo. Gail Mendoza