MANILA, Philippines- Ipinaalala ng Korte Suprema na habang ang mga nagpapahiram ng pera ay maaaring makakuha ng mga ari-arian na ginagamit bilang loan collateral, ang pagmamay-ari ay hindi maaaring awtomatikong ilipat sa kanila, maliban kung may hiwalay na kasunduan.
Sa desisyong isinulat ni Chief Justice Alexander G. Gesmundo, kinatigan ng First Division ng Korte Suprema ang paglipat ng pagmamay-ari ng lupang pag-aari ng Ruby Shelter Builders and Realty Development Corporation sa pinagkakautangan nitong sina Romeo Y. Tan at Roberto L . Obiedo.
Ayon sa Korte Suprema, ang paglilipat na ito ay batay sa isang may bisang kasunduan at hindi lumalabag sa batas na nagbabawal sa awtomatikong paglilipat ng pagmamay-ari ng kolateral.
Humiram ng pera ang Ruby Shelter kina Tan at Obiedo, gamit ang ilang mga ari-arian bilang kolateral. Nang ang natitirang utang ay umabot sa P95 milyon, ang mga partido ay pumirma sa isang Memorandum of Agreement (MOA) na ibenta ang mga ari-arian nito kina Tan at Obiedo bilang bayad sa utang.
Pinagtibay ng Korte Suprema ang bisa ng MOA at sinabing kusang pumasok ang Ruby Shelter sa MOA na ibenta ang mga ari-arian kung hindi makapagbayad. Ipinaliwanag din ng Korte na ang MOA ay hindi bumubuo ng pactum commissorium o isang ipinagbabawal na kasunduan sa ilalim ng Article 2088 ng Civil Code. Ang probisyong ito ay nagsasaad na ang isang tagapagpahiram ay hindi maaaring awtomatikong makakuha ng pagmamay-ari ng kolateral kung ang nanghihiram ay nabigong magbayad.
Ang pactum commissorium ay nangyayari kapag (1) ang isang ari-arian ay ginamit bilang kolateral para sa isang pautang; at (2) ang kasunduan sa pautang ay may kasamang probisyon na awtomatikong naglilipat ng pagmamay-ari ng kolateral sa nagpapahiram kung ang nanghihiram ay nabigong magbayad. Teresa Tavares
