MANILA, Philippines – Inaresto ng Bureau of Immigration (BI) Intelligence Division ang isang Pakistani national sa Barangay Tiguma, Pagadian City, Zamboanga del Sur sa paglabag sa Philippine immigration laws.
Si Sajjad Khan, 31, ay inaresto noong Hunyo 16 sa bisa ng mission order na inisyu ni Commissioner Joel Anthony Viado kasunod ng intelligence information tungkol sa kanyang illegal na pamamalagi.
Nakita sa rekord ng BI na pinagbawalan na sa bansa ang dayuhan mula pa noong 2016.
Napag-alaman na illegal umano itong pumasok sa Pilipinas sa pamamagitan ng bangka.
Natukoy na mayroon itong paglabag sa Section 37(a)(1) ng Philippine Immigration Act of 1940, sa illegal na pagpasok at pagiging undocumented alient.
Si Khan ay dinala sa Zamboanga del Sur Police Provincial Office para sa dokumentasyon at imbestigasyon.
Kalaunan ay inilipat ito sa Bureau of Immigration Warden Facility sa Camp Bagong Diwa, Taguig City para sa temporary custody habang nagpapatuloy ang legal proceedings.
Ang pag-aresto ay isinagawa sa koordinasyon sa Armed Forces of the Philippines at 53rd Infantry Battalion ng Philippine Army. RNT/JGC
