MANILA, Philippines- Tinawag nina Leila De Lima at Chel Diokno, representatives-elect ng Mamamayang Liberal at Akbayan party-lists, nitong Lunes ang impeachment trial na isang “civilized and sacred process.”
Ito ang naging komento nila matapos sabihin ni Vice President Sara Duterte nitong Sabado na, “I truly want a trial because I want a bloodbath.”
“Hindi ko alam kung saan nanggagaling ‘yun dahil ang impeachment trial ay isang civilized legal process at ang mangyayari doon ay malalaman ng buong bansa ang katotohanan,” pahayag ni Diokno sa sidelines ng proklamasyon ng Comelec ng 2025 partylist race winners.
Iginiit niyang sinusuportahan ng Akbayan partylist ang impeachment ni Duterte “to know the truth, exact accountability, and pursue justice for the country.”
Sa hiwalay na panayam, sinabi ni De Lima na sinusubukan umano ni Duterte “to court sympathy” dahil papalapit na ang impeachment trial.
“Siguro ganon ang ginagawa ni VP Sara para lalo siyang, alam mo na, she’s trying to court sympathy dahil mapalapit na nga yung impeachment trial,” pahayag ni De Lima, first nominee ng Mamamayang Liberal, matapos ang proclamation ceremony.
“Hindi po ganon ang impeachment proceedings. Sagrado po ang constitutional process of impeachment na dapat wala itong puwang para sa kaguluhan, para sa chaos, para sa drama or para sa theatrics,” dagdag niya.
Pinatalsik ng House of Representatives ang Bise Presidente noong February 5, sa pag-akusa sa kanya ng “betrayal of public trust, culpable violation of the constitution, graft and corruption and other high crimes” base sa pitong tinukoy na Articles of Impeachment. RNT/SA
