MANILA, Philippines – Nagpalabas na si Pangulong Ferdinand R. Marcos Jr. ng Executive Order (EO) 93 na nag-aatas sa Department of Agriculture (DA) na pangunahan at i-monitor ang implementasyon ng 60-day suspension ng importasyon ng regular milled at well-milled rice.
Ayon sa kautusang nilagdaan ni Pangulong Marcos noong Agosto 29, ang suspensyon ng rice imports ay tatagal mula Setyembre 1 hanggang Oktubre 30, maliban kung paiikliin o palalawigin.
Hindi naman sakop ng 60-day suspension ang specialty rice varieties na hindi karaniwang pino-produce ng mga lokal na magsasaka.
“The DA is hereby directed to lead and monitor the implementation of the suspension of rice importation, and undertake necessary measures to ensure that the country’s supply of rice remains sufficient during the period of suspension, subject to existing laws, rules and regulations,” ayon sa kautusan.
Sa ilalim ng EO 93, ang DA ay kailangan makipagtulungan sa Department of Economy, Planning, and Development (DEPDev) at Department of Trade and Industry (DTI), at magsumite ng komprehensibong ulat ukol sa domestic rice supply at umiiral na market prices.
Ang tatlong ahensya ay kinakailangang magpulong sa loob ng 30 araw mula nang naging epektibo ang EO para i-assess ang epekto nito at irekumenda sa Pangulo kung babawiin o i-extend ang suspensyon.
Ang panahon ng suspensyon ay maaaring paikliin o palawigin, kung kinakailangan, base sa joint recommendation ng DA, DEPDev, at DTI.
“For this purpose, the DA, DEPDev, and DTI shall convene within 30 days upon effectivity of this Order to evaluate the effects of the suspension of importation on the supply and prices of rice in the country, and within 15 days therefrom submit a joint recommendation to the President, through the Executive Secretary,” ang nakasaad sa EO.
Ipinag-uutos ng bagong EO ang agarang pagpapalabas ng kinakailangang mga alituntunin na gagawin ng DA, sa pakikipag-ugnayan sa Bureau of Customs at DTI, upang masiguro ang epektibong implementasyon ng suspension order.
Samantala, ang EO 93 ay isinapubliko nitong Sabado at kagyat na magiging epektibo sa oras na mailathala sa Official Gazette o sa pahayagang may general circulation. Kris Jose
