ILOILO, Philippines – Arestado ang isang empleyado ng Oton, Iloilo na kinikilala bilang high-value target sa ilegal na droga, matapos makumpiska ang tinatayang P2.17 milyon halaga ng shabu sa isang buy-bust operation sa Barangay Buray noong Biyernes.
Kinilala ang suspek bilang si “Scobe,” 46, na nagtatrabaho sa Oton Municipal Environment and Natural Resources Office.
Inilunsad ang operasyon ng Iloilo Police Provincial Office – Provincial Drug Enforcement Unit, kasama ang Oton Municipal Police Station at Provincial Intelligence Unit, bandang 3:45 p.m. matapos ang halos dalawang linggong intel monitoring at impormasyon mula sa mga residente.
Nasamsam ang pitong sachet ng shabu na tumimbang ng 320 gramo, pati ang buy-bust money.
Kasalukuyang nasa kustodiya ang suspek at haharap sa pormal na kaso ukol sa droga. RNT/MND
