MANILA, Philippines – Ayon sa Independent Commission for Infrastructure (ICI), kailangan nila ng nakasulat na pahintulot mula kay House Majority Leader Rep. Sandro Marcos bago nila ma-release ang video recording ng kanyang executive session tungkol sa imbestigasyon sa flood control anomalies.
Dumalo si Marcos sa ICI hearing noong Disyembre 4, at sinabi niya noong una na ibinigay niya ang buong awtoridad sa ICI na i-release ang video at iba pang detalye ng kanyang pagdalo.
Ngunit ayon kay ICI Executive Director Atty. Brian Keith Hosaka, si Marcos ay “declared under oath that he was not amenable to livestreaming or public broadcasting of his testimony.”
“Thus, until the Commission receives a written authority from Cong. Marcos allowing the release, the commission is constrained from releasing the video recording of his testimony,” ani Hosaka.
Noong nakaraang linggo, sinabi ni Marcos sa media na ibinigay niya ang buong awtoridad sa ICI kung sa tingin nila ay ligtas at hindi makakaapekto sa kanilang imbestigasyon.
Dumalo si Marcos sa ICI hearing isang linggo matapos siyang i-tag ni resigned congressman Zaldy Co sa umano’y budget insertions, na itinanggi ng anak ng Pangulong Ferdinand Marcos Jr. RNT/MND
