PAGSUSUMIKAPAN ng DOT o Department of Tourism na makapag-anyaya ng international guests at maging local tourists sa Mindanao kasabay sa pagbibida ng magandang “peace and security situation” ng rehiyon matapos ang matagumpay na negosasyon ng pamahalaan at ng MNLF o Moro National Liberation Front.
Ito ang binigyang-diin ni Secretary Maria Christina Garcia Frasco sa pagbubukas ng second Mindanao Tourism Expo sa Cagayan de Oro City.
Itinampok ang mga pangunahing tourist spots, produkto, pasalubong, at discounted tour packages ng Zamboanga peninsula, Northern Mindanao, Davao region, SOCCSKSARGEN, CARAGA, at Bangsamoro Autonomous Region for Muslim Mindanao.
Isa nga sa naging pagkilos ng pamahalaan ay ang pagkakaroon ng joint agreement sa pagitan ng DOT, ng DND o Department of National Defense, at ng DILG o Department of the Interior and Local Government para sa pagsusulong ng turismo na nakabase sa kapayapaan at kaayusan.
Inaanyayahan din ng pamahalaan ang mga foreign dignitaries lalo na iyong mga naglalabas ng travel advisories sa kanilang mga mamamayan na bumisita sa rehiyon at ng makita nila mismo ang pagkakaroon ng kapayapaan at kaayusan lalong-lalo na sa BARMM.
Sinang-ayunan ito ni Cagayan de Oro City Mayor Rolando Uy na nagsabing ang nagkakaisang hangarin ng lahat ng local government units ng Mindanao na “to feel safe while enjoying the destinations”.
Sa katunayan nga, ang mainit na pagmamahal ng mga Pilipino sa mga bisita na ating ipinapakita sa pamamagitan ng maayos na pagtanggap ay ang numero unong binabalikang karanasan sa ating bansa.
Sa datos mula sa DOT, nasa 7.1 million tourists ang bumisita sa Mindanao. Sa bilang na ito, nasa tatlong milyon ang nagtungo sa region X o ang Northern Mindanao na binubuong Bukidnon, Camiguin, Lanao del Norte, Misamis Occidental, Misamis Oriental, Iligan City at Cagayan de Oro City.
Misyon ng DOT at ng lahat ng local tourism offices na maipamalita sa buong Pilipinas at sa buong mundo na ang “Mindanao is a treasure of natural wonders”.
