MANILA, Philippines – Hindi sa social media bagkus sa ebidensya dedesisyunan ang impeachment complaint laban kay Vice President Sara Duterte, pagtiyak ni House Committee on Justice Chairman at Batangas Rep. Gerville Luistro.
Sa kanyang opening statement sa pagbubukas impeachment hearing sinabi ni Luistro na ibabase sa ebidensya ang pagdedesisyon sa impeachment complaint, ang kanila umanong ginagampanan ay ang kanilang tungkulin.
“Impeachment is a constitutional process—not a social media contest. Hindi hashtag ang magpapasya dito.Hindi meme ang maghahatol. Hindi ito paramihan ng like,” ani Luistro.
“If an impeachment complaint is filed and referred to the Committee, we must examine it. There is no option to ignore these complaints. And as I said a while ago, we must fulfill this duty. No condition. No hesitation. Walang palusot. Hindi tayo maaaring umiwas. Hindi maaaring umurong. Hindi maaaring magbulag-bulagan,” giit pa nito.
Pinaalalahanan din nito ang kanyang mga kapwa miyembro sa komite na huwag manahimik sa isyu ng fake news.
“Kapag kumakalat ang fake news, hindi sapat ang manahimik. Ang tamang sagot ay wastong proseso. Ang kailangan natin ay simulan itong proseso ng pagsusuri, nang sa gayon ay magkaroon tayo ng linaw at hindi maligaw sa maling impormasyon,” pagtatapos pa nito. Gail Mendoza
