MANILA, Philippines — Umalis ng Pilipinas sa magkahiwalay na biyahe sina Senator Loren Legarda at kanyang anak na si Batangas First District Representative Leandro Leviste, ayon sa National Bureau of Investigation nitong Biyernes.
Sinabi ni NBI Director Melvin Matibag na nagtungo si Leviste sa Hong Kong habang lumipad naman si Legarda patungong France noong Agosto 2.
Ayon kay Senator Erwin Tulfo, naka-medical leave si Legarda at naghain ito ng leave of absence.
“She asked for permission, she filed for leave of absence. It is a medical leave,” ani Tulfo.
Nang tanungin kung nakakuha ng travel authority si Legarda, sinabi ni Tulfo, “Yes, I believe it is dated August 3 to 5.”
“That is why during the last [impeachment] hearing, she wasn’t around,” dagdag niya.
Kinumpirma rin ng kampo ni Legarda na naka-medical leave ang senadora.
Ang pag-alis nina Legarda at Leviste ay nangyari matapos ihayag ng Office of the Ombudsman na iniimbestigahan sila kaugnay ng P10-bilyong plunder at graft complaints dahil sa umano’y kabiguan ng renewable energy firm ni Leviste na makapagbigay ng solar power alinsunod sa congressional franchise nito.
Hiwalay ding iniimbestigahan ng NBI si Leviste dahil sa umano’y tangkang i-frame si Executive Secretary Ralph Recto. Itinanggi ng Batangas lawmaker ang mga alegasyon.
Noong Mayo, naghain ang Department of Energy ng reklamo sa Department of Justice laban kay Leviste at limang opisyal ng Solar Para sa Bayan Corporation dahil sa umano’y paglabag sa Public Service Act.
Samantala, sinabi ni Senate President Sherwin Gatchalian na wala siyang impormasyon tungkol sa pagbiyahe ni Legarda.
“I don’t have any information about her foreign trip. Hindi pa po kami nag-uusap tungkol sa trip niya,” ani Gatchalian.
Dagdag niya, hindi kailangan ni Legarda ng travel authority mula sa Senado para sa kanyang biyahe. RNT
