LPNH stabbing incident kinondena ni Villar; LIGTAS Act, isinusulong

Pasay City — Mariing kinondena ni Senator Mark A. Villar ang pananaksak na ikinasawi ng isang Grade 9 student sa loob ng Las Piñas National High School, at sinabing ang trahedyang ito ay patunay sa agarang pangangailangang higit pang palakasin ang kaligtasan at seguridad sa mga paaralan.

“Ang ating mga paaralan ay dapat manatiling lugar ng kaligtasan, pagkatuto, at pag-asa—hindi lugar kung saan nalalagay sa panganib ang buhay ng ating mga kabataan. Walang estudyante ang dapat matakot para sa kanyang seguridad habang siya ay nag-aaral at nagsusumikap para sa kanyang mga pangarap,” ani Villar.

Nagpaabot ang senador ng pakikiramay sa pamilya ng biktima, samantalang ang kanyang tanggapan ay patuloy na nagbibigay ng tulong at suporta sa naulilang pamilya sa gitna ng trahedya.

Nanawagan si Senador Villar sa mga kinauukulang lokal na pamahalaan at ahensya ng pamahalaan na magsagawa ng mabilis at masusing imbestigasyon upang matiyak ang pananagutan, kasabay ng pagpapatupad ng mas mahigpit na mga hakbang sa seguridad upang maiwasang maulit ang mga katulad na insidente. Hinikayat din niya ang mga paaralan, magulang, guro, at buong komunidad na magtulungan sa pagtataguyod ng kultura ng respeto, malasakit, at mapayapang pagresolba ng alitan sa mga kabataan.

Binigyang-diin ni Villar na ipinapakita ng insidenteng ito ang kahalagahan ng agarang pagsusulong ng kanyang panukalang Senate Bill No. 2321 o ang Learning Institution’s Guaranteed Threat Avoidance and Safety (LIGTAS) Act, na naglalayong magpatupad ng mas matibay na proteksyon sa mga paaralan sa pamamagitan ng mas mataas na police visibility, koordinadong threat assessment, direktang emergency hotlines para sa pulisya, bumbero, at iba pang response units, agarang abiso sa mga magulang sa panahon ng emergency, sapat na first-aid at emergency equipment, at pagkakaroon ng sinanay na medical personnel at security guards.
Itinatakda rin ng panukala ang estratehikong paglalagay ng CCTV cameras at angkop na security screening systems, pati na ang komprehensibong pagsasanay sa school safety at security para sa mga estudyante, guro, at iba pang personnel ng paaralan.

“Hindi na natin maibabalik ang buhay na nawala dahil sa masakit na trahedyang ito, ngunit hindi tayo maaaring manatiling walang ginagawa. Kailangan nating kumilos nang maiwasang maulit ang ganitong mga pangyayari at matiyak na ligtas ang bawat paaralan para sa ating mga anak. Ang bawat batang Pilipino ay may karapatang makapag-aral sa isang kapaligirang ligtas, protektado, at malaya mula sa anumang uri ng karahasan,” ani Villar. RNT