MAHIGIT 400 na employer at establisimyento sa Metro Manila ang pinadalhan ng violation notices ng
Social Security System (SSS) matapos mabigong i-remit ang buwanang kontribusyon ng kanilang mga
empleyado.
Sa isinagawang Run After Contribution Evaders (RACE) operations ng SSS National Capital Region (NCR),
natukoy ang mahigit 400 kumpanya na may kabuuang pagkakautang na pumatak sa ₱145.3 million.
Dahil sa hindi pagpasa ng kontribusyon, tinatayang 3,484 na manggagawa ang naapektuhan at
nanganganib na magkaroon ng problema sa kanilang mga benepisyo at loan privileges.
RACE Operations sa Quezon City at mga Inisyatibo ng SSS
Kabilang sa mga tinutukoy na operasyon ay ang isinagawa ng SSS Diliman Branch sa Quezon City kung
saan 10 employer— kabilang ang bakeshop, religious shop, law firm, at starch manufacturer—ang
binigyan ng notices dahil sa ₱4.2 million na delinquency.
Pinaalalahanan ni SSS Senior Vice President Benjamin Dolindo Jr. at SSS NCR North Legal Department
Acting Head Louella Apilado ang mga employer na may mga paraan para ayusin ang kanilang obligasyon
tulad ng:
Installment Arrangements: Para sa mga kwalipikadong negosyong may problemang pinansyal
upang hindi kailangang bayaran nang isang bagsakan ang utang.
Condonation Program: Nagbibigay ng reliefs at pakonsuwelo sa mga kwalipikadong employer
upang maayos ang kanilang huling record.
Reconciliation at Dispute Filing: Pagkakataon para sa reconciliation bago tuluyang humarap sa
mabigat na pananagutang legal.
Direktang Epekto sa mga Manggagawa
Iginiit ng SSS na alinsunod sa Social Security Act of 2018, ang kinakaltas na kontribusyon ay hindi dapat
ituring na ordinaryong business expense lamang kundi isang batayang proteksyon para sa mga
manggagawa.
Kapag hindi updated ang remittance ng employer, direktang naapektuhan ang kakayahan ng empleyado
na makakuha ng mahalagang benepisyo tulad ng sickness, disability, maternity, retirement, at death
benefits, pati na rin ang eligibility sa iba’t ibang SSS loans. Dahil dito, patuloy ang SSS sa pagsasagawa ng
RACE operations upang garantiyahang natatanggap ng bawat manggagawa ang karapat-dapat na social
security protection.
