INANUNSYO ng mga opisyales ng Pag-IBIG Fund na umabot sa P140.54 bilyon ang inilabas na housing loan ng ahensya noong taong 2025. Ito ay mas mataas ng 8% kumpara sa P129.73 bilyon na naitala noong 2024. Ang mga programa sa pabalay ng ahensya ay nakatulong sa 90,727 manggagawang Pilipino upang makabili ng sariling bahay o magpondo para sa konstruksyon, renobasyon, o pagsasaayos ng tirahan.
Kamakailan lamang ay kinilala ni Pangulong Ferdinand R. Marcos Jr. ang ahensya sa ginanap na National Housing Expo noong nakaraang Oktubre 2024 dahil sa mga pagsisikap nitong palawakin ang access sa abot-kayang pabahay sa bansa. Ayon sa Pag-IBIG, ang tagumpay na ito ay repleksyon ng patuloy na sigla ng affordable housing finance sa Pilipinas.
“Nalulugod kaming iulat na ang nakamit ng Pag-IBIG Fund sa housing loan noong 2025 ay nagpapakita ng aming patuloy na paggawa sa ilalim ng Expanded Pambansang Pabahay para sa Pilipino Program o Expanded 4PH, upang matulungan ang mas maraming manggagawang Pilipino na magkaroon ng disenteng tahanan,” pahayag ni Jose Ramon P. Aliling, Kalihim ng Department of Human Settlements and Urban Development (DHSUD) at Tagapangulo ng Pag-IBIG Fund Board of Trustees.
Dagdag pa niya, suporta ito sa direktiba ni Pangulong Marcos Jr. na pabilisin ang paghahatid ng murang pabahay sa pamamagitan ng pananatiling accessible ng pondo para sa mga Pilipino. Target din nilang higit pang palakasin ang ugnayan sa mga shelter partners sa 2026 upang mapabilis ang paglalabas ng loan.
Ayon naman kay Pag-IBIG Fund Chief Executive Officer Marilene C. Acosta, ang kanilang mga programa ay idinisenyo upang manatiling abot-kaya ang pagkakaroon ng sariling bahay para sa mga miyembro nasa Pilipinas at maging sa ibang bansa.
Sa kabuuang halaga ng pautang, iniulat ng ahensya na:
• 7,056 unit ng Expanded 4PH socialized housing (nagkakahalaga ng P7.63 bilyon) ang napondohan sa ilalim ng subsidized na 3% interest rate.
• 4,811 unit (nagkakahalaga ng P6.2 bilyon) naman ang napondohan sa ilalim ng 4.5% promotional rate para sa mga loan na hanggang P1.8 milyon.
“Ang Pag-IBIG Fund ay nananatiling kaisa sa layunin ni Pangulong Marcos Jr. na palawakin ang access sa de-kalidad at abot-kayang pabahay, lalo na para sa mga minimum wage earners at middle-income members,” ani Acosta.
