HINDI biro-biro ang malamig at maulan na panahon.
Parehong nakamamatay ang mga ito, mga Bro.
Katatapos lang ang tag-ulan sa kalakhan ng mahal kong Pinas ngunit may natitirang bahagi na maulan, kahalo ang lamig.
SA DAVAO REGION
Matatagpuan sa Davao Region ang matinding pananalanta ng lamig at ulan.
Mahigit na ring isang linggo na laman ng mga balita ang mga landslide at baha dahil sa lamig at ulan.
Umaabot ang balita sa lahat ng sulok ng mundo at nakasasabay nito ang mga balitang baha at bagyo maging sa Amerika.
Noong una, ilan lang ang nauulat na nasawi sa baha at landslide.
Makaraan ang mga araw, mga Bro, 22 tao na.
Ngayong huli, naririyan ang dagdag na nakamamatay na landslide.
Sa natabunan na mga bus sa Maco, Davao de Oro, may 15 na nailigtas mula sa 30 na pasahero ng dalawang bus at kasalukuyan ang hukayan.
Swerte ang mga pasahero ng ikatlong bus na nakaalis na nang maganap ang pagguho ng lupa.
Kailangang mabilis ang paghuhukay sa landslide sa bus station upang mahabol ang buhay ng mga natabunan.
Maaaring kaya ang mabilis na paghuhukay dahil sementado ang flooring at may mga istruktura na maaaring hindi napuno ng putik at doon matatagpuan ang ibang mga biktima.
41 NAWAWALA SA IBA
Sa kalapit na lugar na meron ding landslide, mas marami umano ang natabunan mula sa mga lupa na gumuho mula sa matataas na lugar.
Gumuho ang mga lupa dahil rumupok na ang mga ito sa halos walang tigil na ulan sa lugar.
Tinutukoy ang lugar na isang minahan.
Meron umanong natabunang 86 katao at 45 rito ang nailigtas na kaya may natitira at hindi pa nakikitang 41 na minero o pamilya nila.
Paano kung sa loob ng ilang araw, patay na ang mga ito?
Mas hirap ang kalagayan ng mga biktima rito dahil nagsasanib ang mga putik na gumuho at maputik na lupa na natabunan.
Alalahaning, kapag naganap ang landslide at putik lahat ang tumabon sa mga tao, walang lugar para hingahan ang mga biktima at karaniwang bibihira ang naliligtas.
Ano’t anoman, ipagdasal na lang ang mga biktima at umasa tayo sa awa ng Diyos sa kanila.
GAGAWIN PARA SA KALIGTASAN
Pero hindi lang paghuhukay, pagliligtas at pagdarasal sa mga natabunan sa landslide ang dapat isipin at gawin dito, mga Bro.
Kailangan na rin ang pagsusuri, pagplapano at pagkilos ukol sa paninirahan at paghahanapbuhay sa lugar.
Ligtas pa ba ang lugar at hindi pa ba pupwedeng ilikas at ilipat ang mga residente sa mga mas ligtas na lugar?
Dapat pag-aralan nang husto ng mga awtoridad kung ano-ano ang mga nararapat na gawin.
Ang buhay ang siyang pinakamahalaga sa lahat at dapat ang kaligtasan sa panganib at kamatayan ang kauna-unahan sa listahan na dapat isaalang-alang.
