MATAGUMPAY na idinaos ng Department of Labor and Employment (DOLE), sa pangangasiwa ng Bureau of Local Employment at Planning Service, ang dalawang araw na konsultasyon para sa kahandaan ng lakas-paggawa at pamamahala ng artificial intelligence noong Marso 4 at 5, 2025 sa Cebu City.
Layunin ng aktibidad na ihanda ang mga manggagawang Pilipino para sa umuusbong na pagbabago sa merkado ng paggawa at tugunan ang epekto ng AI sa trabaho.
Sa kanyang pangunahing talumpati, muling pinagtibay ni DOLE Undersecretary for Employment and Human Resource Development Cluster Carmela I. Torres ang pangako ng Kagawaran na bigyan ng kinakailangang kasanayan ang lakas-paggawa upang makatugon sa mga pagbabago dulot ng artificial intelligence.
“Sa mga pagbabagong dala ng AI sa industriya na nangangailangan ng mga bagong kasanayan, dapat nating bigyang prayoridad ang mga inisyatiba na makakatugon at magpapahusay sa kakayahang magtrabaho ng manggagawa. Kabilang dito ang matatag na programa sa pagsasanay na nakatuon sa digital literacy at AI-related competency, upang tiyakin na hindi maaalis sa trabaho ang manggagawa, bagkus mas papatatagin pa ito dahil sa kanilang kasanayan sa paggamit ng teknolohiya,” pahayag ni Undersecretary Torres.
Iprinisinta ng Microsoft at Globe Telecom ang “real-world applications of AI in workplaces”, at kanilang binigyang-diin ang kahalagahan ng pagpapaunlad ng kulturang “ligtas para sa pagbabago”.
Itinampok sa talakayan ang mga pananaw ng mga eksperto mula sa Analytics and Artificial Intelligence Association of the Philippines, National Economic and Development Authority, National Privacy Commission, at DOLE Institute for Labor Studies. Tinalakay ng mga panelist ang mga kritikal na isyu, tulad ng transparency, legal framework, at etikal na pagpapatupad ng AI, kasama si Bureau of Local Employment Director Patrick P. Patriwirawan, Jr., bilang moderator.
Nagbahagi rin ang IT and Business Process Association of the Philippines at Aboitiz Data Innovation ng kanilang pananaw ukol sa sa etikal na pagpapatupad ng AI, transparency, legal framework, at ang epekto ng AI sa pagpapaunlad ng lakas-paggawa.
Binigyang-diin ni Department of Information and Communications Technology (DICT) Undersecretary Jocelle E. Batapa-Sigue ang suporta ng kanilang ahensya para sa mga pagsisikap ng DOLE sa integrasyon ng AI, na lalong nagpapatibay sa kahalagahan ng pagtutulungan para sa maayos na transisyon ng lakas-paggawa sa paggamit ng AI.
Nagpahayag din ng kanilang suporta ang Commission on Higher Education (CHED) at ang Federation of Free Workers (FFW), na nagbibigay-diin sa kahalagahan ng pagbibigay ng kinakailangang kasanayan ng mga manggagawa upang magtagumpay sa mabilis na pagbabago ng merkado ng paggawa.
Binanggit din ni DOLE Planning Service Director Adeline T. De Castro na ang policy principle ng DOLE sa AI ay nakabatay sa transparency, oversight, non-discrimination, at pagsunod sa mga batas-paggawa, na mahalaga sa pagtataguyod ng responsableng pamamahala ng AI sa mga lugar-paggawa.
