MANILA, Philippines- Kasunod ng alingasngas sa ‘Love the Philippines’ slogan ng Deparment of Tourism, iminungkahi ni House Ways and Means Committee Chairman at Albay Rep. Joey Salceda na dapat magkaroon ng nationwide consultations kasama ang tourism stakeholders upang makabuo ng tunay na rebranding para sa tourism sector ang bansa.
Ayon kay Salceda, maaaring maglunsad ang bansa ng Sulong Turismo na isang consultative conference, na isang paraan para makakuha ng mga ideya sa stakeholders at matutukan ang talagang mahalaga sa sektor ng turismo na tinukoy bilang 6 As– attraction, accessibility, amenities, available packages, activities at ancillary services.
Ani Salceda, tapos na ang “blunder” sa stock footage sa promotional video ng “Love the Philippines” campaign at kailangan nang umusad sa isyu at gumawa ng paraan para hindi na ito maulit.
“The back-and-forth of statements was good for revealing what needs to be improved. But we have to move forward. Let’s genuinely sit down and talk,” giit ni Salceda.
Ipinaliwanag ni Salceda na ang Sulong Pilipinas ay dati nang ginawa sa nakaraang administrasyon at napatunayan naman na mas mabisa itong paraan para makuha ang tunay na kailangan pagdating sa turismo.
“It was an inclusive approach in policymaking that brought together different stakeholders to provide inputs on how to improve governance. At the end of each consultation, you had actionable points that were submitted to the President to be given the highest priority,” paliwanag pa ng mambabatas.
Una nang iniutos ni Tourism Secretary Christina Frasco ang imbestigasyon sa kontrobersiyal na “Love the Philippines” campaign video dahil sa paggamit sa stock footages na kuha pa sa ibang bansa. Inako naman ng DDB Philippines na siyang kontraktor ng DOT ang buong responsibilidad sa insidente.
Ang “Love the Philippines” ay inilunsad ng DOT kapalit ng “It’s More Fun in the Philippines” slogan. Gail Mendoza
