Iginiit ni 1Tahanan Party-list Representative Nathaniel Oducado ang pangangailangang suspindihin ang excise tax sa fuel habang ipinagpapatuloy ng House Committee on Ways and Means ang deliberasyon sa mga panukalang hakbang upang maibsan ang epekto ng mataas na presyo ng langis sa mga mamimiling Pilipino.
Sa pagdinig, binigyang-diin ni Oducado na dalawang uri ng buwis ang kasalukuyang ipinapataw sa produktong petrolyo—ang Value-Added Tax (VAT) at ang excise tax—na parehong nakadaragdag sa gastos ng mga motorista at karaniwang pamilya.
Dumalo rin sa pulong ang mga kinatawan ng mga kumpanya ng langis, ang Department of Energy Philippines, at iba pang ahensya ng pamahalaan upang talakayin kung aling regulatory body ang dapat manguna sa pagbabantay sa patuloy na pagtaas ng presyo ng krudo.
Ayon kay Oducado, mahalagang magkaroon ng malinaw at epektibong sistema ng pagbabantay upang maprotektahan ang kapakanan ng mga mamimili habang isinasaalang-alang din ang pangangailangan ng ekonomiya.
“Habang patuloy na tumataas ang presyo ng langis sa pandaigdigang merkado, hindi dapat lalong mabigatan ang mga Pilipino sa bawat litro ng gasolina o diesel na kanilang binibili. Kung may pabigat na sa pandaigdigang presyo, hindi na dapat dinadagdagan pa ng sistema ng buwis na lalo lang nagpapahirap sa mamamayan,” ani Oducado.
Dagdag niya, layunin ng nagpapatuloy na deliberasyon na matukoy ang pinakaangkop na mekanismo ng regulasyon upang mapalakas ang pagbabantay sa presyo ng langis at makapagbigay ng agarang ginhawa sa mga mamimili.
Inaasahang magpapatuloy pa ang mga talakayan ng komite sa mga susunod na pagdinig habang sinusuri ang mga datos pang-ekonomiya, saklaw ng kapangyarihan ng mga ahensya, at ang posibleng epekto ng panukala sa mga mamimili at kita ng pamahalaan. RNT
