MANILA, Philippines- Kinondena ng Philippine Navy ang paggamit ng China ng long-range acoustic device (LRAD) laban sa Philippine Coast Guard (PCG), tinawag itong senyales ng umiigting na agresyon ng Beijing sa West Philippine Sea (WPS).
“The long-range acoustic device is an increase in the aggression of the Chinese Communist Party in the West Philippine Sea. It only highlights their illegal presence, coercive, and now more aggressive actions,” pahayag ni Philippine Navy spokesperson for the WPS Rear Admiral Roy Vincent Trinidad sa isang press briefing.
Noong January 25, ginamitan umano ng China Coast Guard (CCG) vessel 3304 ng LRAD ang BRP Cabra ng PCG habang nagpapatrolya ito sa baybayin ng Zambales.
Nagpoprodyus ang LRAD ng high-decibel sound waves na nagdudulot ng sakit ng tenga at potensyal na problema sa pandinig, batay sa BRP Cabra crew.
Iniulat din ng PCG na tila sinasamahan ang CCG 3304 ng CCG 5901, kilala bilang “monster ship.”
“In the WPS, I would like to highlight that amid all of this increase in the aggressive actions of the CCG, the PCG has been standing its ground,” giit ni Trinidad.
Tiniyak din niya na ang Philippine military, kabilang ang Navy, Air Force, at Army, ay aktibong pinoprotektahan ang soberanya ng bansa sa WPS. RNT/SA