MANILA, Philippines – Pinaiimbestigahan na ni Manila Police District Director P/Brig.General Arnold Thomas Ibay ang nangyaring insidente sa loob ng Manila North Cemetery kung saan nabugbog ang isang LGBTQ+.
Ang biktima ay napag-alamang hindi residente ng MNC at nakipag-inuman sa loob ng sementeryo madaling araw ng Biyernes, Nobyembre 1.
Sa panayam kay Ibay, sinabi na mahigpit ang ginagawang pagbabantay ng mga kapulisan kaya maaari aniyang ‘stock’ ng mga nakatira sa loob ng sementeryo ang mga alak.
“Sa higpit ng seguridad sa harap pa lamang ng sementeryo, imposibleng may makalusot,” ani Ibay.
Ayon pa kay Ibay, dahil sa nangyari ay magpapaikot na siya ng mga pulis sa loob ng sementeryo upang maiwasan ang kahalintulad na insidente.
Samantala, sinabi ni Ibay na hanggang alas-7 ng gabi lamang maaaring magpapasok sa sementeryo. Jocelyn Tabangcura-Domemden
