MANILA, Philippines- Nakatakdang pag-usapan nina Pangulong Ferdinand “Bongbong” Marcos Jr. at Japan Prime Minister Ishiba Shigeru ang Reciprocal Access Agreement (RAA) defense pact at iba pang bagay na may kinalaman sa national security cooperation.
Sa isang kalatas na ipinalabas ng Embassy of Japan sa Maynila, inanunsyo ni Ambassador Endo Kazuya ang detalye ng pagbisita ni Ishiba sa Maynila sa Abril 29 hanggang 30, tanda ito ng bagong unang bilateral visit ng Japan Prime Minister sa Pilipinas at nataon naman para sa ika-70 anibersaryo ng normalisasyon ng relasyon ng dalawang bansa sa susunod na taon.
“The summit meeting with President Marcos will involve discussions on various matters, some of which relate to national security cooperation and maritime law enforcement cooperation,” ang sinabi ni Endo.
“These include the Japan-Philippines Reciprocal Access Agreement, signed during the 2+2 Meeting last July 2024 and currently being prepared to enter into force, the transfer of air surveillance radar systems, and the Official Security Assistance extended by Japan to the Philippines. To further these cooperative aspects, we look forward to opportunities to deepen collaborations in such areas as logistics and information,” dagdag na wika nito.
Sa pamamagitan ng RAA, mabibigyan ng access ang military personnel mula sa dalawang estado upang magdaos ng joint trainings sa bawat bansa nito.
Ang hakbang ay bahagi ng pagsisikap na palakasin ang kanilang defense alliance sa gitna ng lumalagong pagpupumilit ng Tsina sa rehiyon.
Ang RAA, kahalintulad sa 1999 Visiting Forces Agreement (VFA) sa pagitan ng Pilipinas at Estados Unidos, ay third defense accord ng Japan matapos ang United Kingdom at Australia.
Ang parehong kasunduan ay magsisilbi bilang legal framework na magbibigay pahintulot sa American at Japanese forces na pansamantalang bumisita sa bansa para sa military exercises at magbigay ng humanitarian at disaster-response aid.
Ang kahalintulad na kasunduan ay nilagdaan ng Pilipinas at Australia noong 2007.
Pinagbabawalan kasi ng 1987 Philippine Constitution ang foreign troops mula sa pagtatatag ng permanenteng military bases sa bansa.
Maliban sa security cooperation matters, pag-uusapan din ang international affairs alinsunod sa interests ng dalawang estado na makamit ang “free at open Indo-Pacific.”
“The discussions will further promote our security and defense cooperation in order to maintain and strengthen rules-based international order and enhance collaborations on various matters. To this day, Japan and the Philippines have seized various opportunities as maritime nations and strategic partners who share the same fundamental values and principles,” ang sinabi ng embahada.
Sa gitna ng kamakailan lamang na trade policy shift ng Estados Unidos, binanggit din ng Japanese embassy ang kahalagahan ng Pilipinas at Japan sa pagpapalitan ng “views on this matter accordingly.”
“I believe that Japan and the Philippines, both sharing the same values, should continue to cooperate for strengthening the global economy based on the multilateral trading system,” ayon kay Endo.
Binanggit din ng Japanese ambassador to the Philippines ang suporta ng Japan para sa Pilipinas sa larangan ng telecommunication through Open Radio Access Network (RAN) at undersea cables, infrastructure development ng mga riles at highways, at enerhiya sa anyo ng liquefied natural gas (LNG).
Winika pa ni Endo ang patuloy na kontribusyon ng Japan para labanan ang climate change, paghusayin ang agricultural productivity at disaster preparedness sa Pilipinas, at maging ang Mindanao Peace Process, na aniya’y nananatiling mahalagang agenda para sa dalawang bansa.
Samantala, bago pa ang pagdating ng prime minister ng Japan, magkakaroon din ang senior officials, Minister of Land, Infrastructure, Transport, at si Tourism Nakano Hiromasa ng official visit mula Abril 27 hanggang 28. Kris Jose
