NAKIISA na ang Robinsons Land Corporation (RLC) sa lumalaking hanay ng mga nangungunang
developer partner ng Pag-IBIG Fund upang mag-alok ng mga tahanang abot-kaya ng mga
manggagawang Pilipino. Ang mga bahay na ito ay maaaring mabili sa pamamagitan ng Pag-IBIG
Housing Loan sa ilalim ng Expanded Pambansang Pabahay para sa Pilipino (Expanded 4PH) Program ni
Pangulong Ferdinand R. Marcos Jr.
Naganap ang pagtutulungang ito kasabay ng pagdiriwang ng bansa sa National Shelter Month, kung
saan ang Department of Human Settlements and Urban Development (DHSUD), Pag-IBIG Fund, at mga
kasosyo sa pribadong sektor ay patuloy na nagtutulungan upang magdala ng mas maraming de-kalidad
at abot-kayang tahanan para sa mga pamilyang Pilipino.
Ayon kay Pag-IBIG Fund Chief Executive Officer (CEO) Marilene C. Acosta, ang pagdami ng mga
developer partner na tulad ng Robinsons Land ay malaking tulong upang itugma ang mas maraming
abot-kayang bahay sa pondo na naaayon sa kakayahan ng mga miyembro.
Binigyang-diin din ni DHSUD Secretary at Pag-IBIG Fund Board Chairman Jose Ramon P. Aliling na ang
lumalawak na partisipasyon ng mga nangungunang developer ay nagpapakita na ang direktiba ng
Pangulo sa pabahay ay nagbubunga ng mas maraming oportunidad para sa ating mga kababayan.
“Inatasan tayo ni Pangulong Marcos na gawin ang lahat ng kinakailangan upang maiabot ang
pagmamay-ari ng tahanan sa mas maraming pamilyang Pilipino sa ilalim ng Expanded 4PH. Nakikita
natin ang tagumpay ng direktibang ito habang mas maraming nangungunang developer ang nakikiisa sa
ating mga pagsisikap,” pahayag ni Sec. Aliling.
Noong Hunyo ngayong taon, sa pamumuno ni CEO Acosta, itinaas ng Pag-IBIG Fund ang maximum
housing loan amount nito sa ₱10 milyon upang bigyan ang mga middle-income earner ng mas maraming
pagpipiliang bahay, habang nanawagan sa mga pribadong developer na mag-alok ng mas mababang
presyo (preferential pricing) para matulungan ang mga miyembro.
Patuloy ring nag-aalok ang Pag-IBIG Fund ng promosyonal na housing loan interest rates na 4.5% kada
taon para sa utang na hanggang ₱4.9 milyon, at 5.75% para sa utang na higit sa ₱4.9 milyon hanggang
₱10 milyon. Ang dalawang rate na ito ay nakatakda o fixed sa unang tatlong taon, at ang promosyonal na
alok ay magagamit hanggang sa katapusan ng taong 2026.
