MANILA- Handa na ang pamunuan ng Armed Forces of the Philippines (AFP), sa pamamagitan ng 11th Infantry “Alakdan” Division and Joint Task Force Orion, na mas lalong pinaigting ang seguridad buong Sulu at Basilan sa gaganaping Eleksyon 2025, bukas.
Sa pahayag ng AFP, nakahanda na sila sa anumang banta o panganib mula dagat, lupa man at mapa-himpapawid para masiguro ang tapat, maayos at mapayapa ang gaganapin halalan.
Sinabi ng Armed Forces of the Philippines (AFP), sa pamamagitan ng 11th Infantry “Alakdan” Division at Joint Task Force Orion, na pinalaki nito ang mga operasyong pangseguridad sa buong Sulu at Basilan bago ang Eleksyon 2025.
Dagdag pa ng AFP, nakipagtulungan na rin sila sa Commission on Elections (Comelec) sa Sulu at Basilan at nagsagawa ng serye ng mga coordinating conference at joint planning session sa law enforcement agencies.
Ito ay para maging maayos ang paglalagay ng mga sundalo at pulis at maging alerto ang mga ito lalo na sa mga lugar na hotspot tuwing eleksyon.
Ayon pa kay Major General Leonardo Peña, 11 Task Force Orion at Commander ng Joint Task Force Orion, ang buong pwersa ng AFP ay nakahanda sa seguridad sa misyon upang labanan ang anumang pagkagambala bago, habang, at pagkatapos ng araw ng halalan. Ang Alakdan Division at JTF Orion ay naninindigan sa pagprotekta sa kasagraduhan ng bawat boto at kaligtasan ng bawat botante.
Kasama sa pinaigting na maritime security effort nito ang paglalagay ng BRP General Mariano Alvarez (PS176), isang fast attack interdiction craft, para magsagawa ng maritime patrols sa loob ng operational area ng 11th Infantry Division.
Ang BRP General Mariano Alvarez ay isa sa mga nakakabit na barkong pandigma sa ilalim ng Joint Task Force Orion, na nagpapalakas ng naval visibility at deterrence sa karagatan ng Sulu.
Dagdag pa, iniulat ng AFP na ang mga pwersang panlupa mula sa 1101st, 1102nd, 1103rd, at 101st Infantry Brigades, kasama ang kanilang mga nakadugtong na batalyon, ay estratehikong naka-deploy sa mga pangunahing munisipalidad sa parehong probinsiya.
Pinaigting din ang maritime patrol sa pakikipag-ugnayan sa Philippine Coast Guard, habang naka-standby naman ang aerial security patrols na nakipag-ugnayan sa Philippine Air Force para magbigay ng mabilis na kakayahan sa pagtugon.
Sa kanilang joint send-off ceremonies, seremonyal na ipinadala ang mga tauhan ng JTF Orion, Philippine National Police, at Philippine Coast Guard sa kanilang mga itinalagang post.
“Kapag may komprehensibong hakbang sa seguridad, nananatiling mapagmatyag at determinado ang mga pwersa ng gobyerno—handa na itaguyod ang kapayapaan, ipagtanggol ang demokrasya, at pangalagaan ang kalooban ng bawat residenteng mapagmahal sa kapayapaan ng Sulu at Basilan,” anang AFP. Mary Anne Sapico
