NAGPAHAYAG ng buong suporta ang Energy Regulatory Commission (ERC) at Department of Energy (DOE)
sa panukala ni Pangulong Ferdinand “BBM” Marcos Jr. na amyendahan ang Electric Power Industry
Reform Act (EPIRA) upang tuluyang alisin ang "system loss charges" na ipinapasa sa buwanang bayarin
ng mga konsyumer.
Sa kaniyang ikalimang State of the Nation Address (SONA 2026), tahasang hiniling ng Pangulo sa
Kongreso na repasuhin ang EPIRA upang maibsan ang pinansiyal na pasanin ng mga pamilya at
negosyong nahaharap sa mataas na presyo ng kuryente.
Ang system loss ay tumutukoy sa kuryenteng nawawala habang ipinapadala mula sa mga planta patungo
sa mga kabahayan. Nagmumula ito sa mga teknikal na dahilan sa mga linya ng kuryente, pati na sa mga
hindi teknikal na sanhi tulad ng pagnanakaw ng kuryente at paggamit ng ilegal na "jumper." Sa
kasalukuyang batas at sa Republic Act No. 7832, pinapayagan ang mga distribution utility na ipasa ang
bahagi ng nawawalang kuryenteng ito sa mga customer.
Ayon sa ERC, prayoridad nito ang kapakanan ng publiko at handa itong makipagtulungan sa Kongreso at
DOE upang maisulong ang mas makatarungan at transparent na sistema sa sektor ng enerhiya.
Samantala, nanawagan naman ang Manila Electric Company (MERALCO) ng masusing pag-aaral sa
panukala. Ayon kay Meralco Executive Vice President Ronnie Aperocho, ang system loss charge ay
bumubuo ng humigit-kumulang 5 porsiyento ng kabuuang electric bill. Ipinaliwanag ng kumpanya na
hindi maiiwasan ang technical system loss sa pamamahagi ng kuryente, ngunit patuloy silang
namumuhunan sa modernisasyon upang mapanatiling mas mababa sa 6.5 porsiyentong limitasyon ng
ERC ang kanilang system loss rate.
Tiniyak ng ERC na babalansehin nito ang proteksyon sa mga konsyumer at ang katatagan ng operasyon
ng mga distribution utility. Kung maaprubahan ng Kongreso ang pag-amyenda sa EPIRA, itinuturing ito
na isa sa pinakamalaking reporma sa sektor ng enerhiya mula noong 2001 na magdudulot ng direktang
bawas-singil sa buwanang kuryente ng milyon-milyong Pilipino.
