NAGBABALA ang Philippine Institute for Development Studies (PIDS) na humigit-kumulang 1.34 milyong Filipino ang posibleng masadlak sa kahirapan dahil sa patuloy na pagtaas ng presyo ng langis sa pandaigdigang merkado. Ang banta ay dulot ng lumalalang tensyon sa Gitnang Silangan na direktang nakakaapekto sa suplay at presyo ng krudo sa buong mundo.
Ang Simulation ng PIDS
Sa inilabas na policy note ng ahensya, gumamit sila ng simulation base sa kasalukuyang sitwasyon kung saan umaabot sa US$105 kada bariles ang presyo ng krudo. Dahil dito, inaasahang tataas ang poverty rate ng bansa mula 13.2% noong 2025 patungong 14.4% ngayong taon. Ito ay maaaring bumura sa mga nakamit na pag-unlad ng ekonomiya nitong mga nakaraang taon.
Ayon sa PIDS, nasa 30 porsyento ng mga pamilyang Pilipino ang itinuturing na “vulnerable” o nanganganib na maghirap, kabilang na ang ilang bahagi ng middle class.
Pinakaapektado ang mga “near-poor” o iyong mga bahagya lamang ang kita sa poverty line, dahil sila ang unang tinatamaan ng pagmahal ng pagkain at transportasyon.
Domino Effect sa Ekonomiya
Bagama’t lahat ay apektado, mas ramdam ng mahihirap ang epekto dahil mawawalan sila ng hanggang 16.2% ng kanilang purchasing power, kumpara sa 3.4% lamang sa mayayamang sektor. Nagbabala pa ang PIDS na kung aabot ang presyo sa US$145 kada bariles, maaaring umakyat sa 3.50 milyong Filipino ang maghirap, lalo na sa mga rural na lugar.
Ang pagtaas ng langis ay may domino effect: tumataas ang pamasahe, singil sa kuryente, at produksyon ng pagkain.
Bilang isang bansang umaasa sa imported na langis, mabilis na nararamdaman ng Pilipinas ang “global price shocks” na nagreresulta sa mataas na inflation.
Aksyon ng Pamahalaan
Upang labanan ito, nagdeklara na ang pamahalaan ng National Energy Emergency. Binuo rin ang Unified Package for Livelihoods, Industry, Food and Transport (UPLIFT) committee na pinangungunahan mismo ni President Ferdinand “BBM” Marcos Jr. Layunin nito ang magbigay ng subsidiya sa transportasyon, diskuwento sa pamasahe, at pautang sa mga MSMEs upang maibsan ang pasanin ng publiko.
Hinihikayat ng PIDS ang gobyerno na tutukan ang direktang tulong sa 4 milyong pamilya sa ilalim ng social protection systems at sa 6.5 milyong vulnerable households upang matiyak na walang maiiwan sa gitna ng krisis.
