MANILA, Philippines- Arestado ang isang babae habang nasaklolohan ang anim na hinihinalang sex trafficking victims, tatlo sa kanila ang menor-de-edad, ng National Bureau of Investigation (NBI) sa Batangas.
Sinabi ng NBI na ang babaeng kinilala lamang sa pangalang Azis, ay nadakip sa isang entrapment operation na isinagawa ng NBI Batangas District Office (NBI- BatDO) noong Feb. 18.
Matapos madakip, kinasuhan si Azis sa Batangas City Prosecutor’s Office ng paglabag sa Republic Act (RA) 9208, ang Anti-Trafficking in Persons Act of 2003, as amended.
“The operation stemmed from an information that the Subject was engaged in human trafficking of minors within the province of Batangas, particularly in Lipa City,” pahayag ng NBI.
“The Subject offers male and female victims including minors for sexual exploitation in exchange for a fee ranging from P2,000 to P8,000,” dagdag nito.
Base sa nakalap na impormasyon, sinabi ng bureau na na-contact ng NBI-BATDO si Azis saka nagkasa ng entrapment operation laban sa kanya sa pakikipagtulungan sa Inter-Agency Council Against Trafficking (DOJ-IACAT), Batangas Office of the City Social Welfare, at NBI Human Trafficking Division (HTRAD). RNT/SA
