Home Banat By DISGRASYA SA EROPLANO PAANO KAYA MAPIPIGILAN?

DISGRASYA SA EROPLANO PAANO KAYA MAPIPIGILAN?

SUNOD-SUNOD ang mga bumagsak na eroplano at tila nauuso ngayon.

Pinakahuli ang pagbagsak ng isang military helicopter at pampasaherong American Airlines matapos magsalpukan sa ere sa ibabaw ng Reagan Washington National Airport sa Washington DC, United States kahapon.

Dire-diretso ang helikopter sa American Airline hanggang sa salpukin nito ang huli na pababa na para mag-landing sa 100 piye na lang sa lupa.

May sakay na 60 pasahero at 4 na crew ang American Airline at may 3 naman ang helikopter at idineklara na silang patay lahat.

Nauna rito, bumagsak din ang eroplano ng Greater Pioneer Operating Company sa sarili nitong airport sa Sudan.

Lahat ng 20 obrero nasawi, kabilang na ang dalawang Tsino at isang Indian at inaalam pa ang dahilan ng disgrasya.

Magkasunod namang bumagsak ang malalaking eroplanong pampasahero sa South Korea kamakailan.

Nitong Disyembre 29, 2024, bumagsak ang isang Jeju Air sa Muan Airport sa South Korea at dalawa lang ang nakaligtas sa 81 na pasahero.

Galing ang eroplano sa Thailand at nakahigop umano ang dalawang makina nito ng mga lumilipad na pato o itik at naging sanhi ng emergency landing nito hanggang sa bumangga sa isang konkretong istruktura sa airport at lumiyab.

Hindi man bumagsak kundi naghahanda nang lumipad ang Air Busan patungong Thailand, biglang nasunog dahil umano sa problema sa mga baterya nito mismo sa Gimhae International Airport sa Busan kamakailan lang.

Mabuti na lang at naging mabilis ang mga responder para iligtas ang 176 na pasahero, kasama ang isang Pinoy.

Sa Pilipinas, may mga nagka-crash na eroplano pero mga pribado at maliliit at helikopter.

Sakaling may maganap na mga crash at disgrasya sa malalaking eroplano sa Pilipinas, gaano kaya kabilis at kahusay ang mga responder natin, pangunahin para magligtas ng mga pasahero at crew?

Pero mas mahalaga, paano tiyakin ng gobyerno na makatulong ang lahat ng nagmamando ng mga paliparan natin para maiwasan ang mga katulad na disgrasya?