MANILA, Philippines – Natuklasan sa Impeachment Court na kasosyo ni Vice President Sara Duterte ang dating embahador ng Pilipinas sa China sa panahon ni dating Pangulong Rodrigo Duterte sa pitong kampanya na nakalista sa Securities and Exchange Commission (SEC).
Sa pagpapatuloy ng impeachment trial nitong Martes sinabi ni private prosecutor Atty Erwin Matib na si Jaime Tan Cruz ang natukoy bilang incorporator ng pitong negosyong idineklara ni Duterte na may hawak siyang shares.
Ayon kay Matib, nagsilbi si Cruz bilang special envoy to China for trade and investments sa ilalim ng administrasyon ni dating Pangulong Rodrigo Duterte.
Kinumpirma ito ng House prosecution panel sa ika-28 araw ng impeachment trial ni Sara Duterte nang tanungin ni Senator-judge Erwin Tulfo.
“Ito po bang si Jaime Tan Cruz is the same person na na-appoint ni dating pangulong Duterte as special envoy to China for trade and investment?” tanong ni Tulfo.
“Yes, they are the same person,” pagtitiyak ni private prosecutor Atty. Erwin Matib.
Kinumpirma rin ni Matib na ito rin ang Jaime Tan Cruz na minsang inalok ni dating Pangulong Duterte na mamuno sa Philippine Health Insurance Corporation bilang chair, ngunit tumanggi ito.
Batay sa records ng Securities and Exchange Commission (SEC), natukoy si Cruz bilang incorporator ng mga sumusunod na kumpanyang may kaugnayan kay Duterte:
1. City Hall King Chow Foods Corporation;
2. Metro City Chow Foods Corporation;
3. Great Jolly Times Foods Corporation;
4. Davao New Royal Taipan Foods Corporation;
5. Davao Emerging Taipans Corporation;
6. Davao Bounty Times Foods Corporation; at
7. JTC Group of Companies Philippines, Inc.
Sinabi noon ng prosecution panel na maaari rin nilang ipatawag mismo si Cruz bilang isa sa mga testigo nito kaugnay ng umano’y unexplained wealth ni Duterte sa Senate impeachment court. Ernie Reyes
