Home Banat By GUTOM SA US AT SA PINAS TUGUNAN

GUTOM SA US AT SA PINAS TUGUNAN

NAGSIMULA nang mawalan ng trabaho o pagkakitaan ang mga Pinoy na alanganin ang kalagayan sa United States dahil sa pagpapalayas roon sa mga iligal at may criminal record.

Kasama na rito ang nasa 350,000 Pinoy na sinasabing iligal na naninirahan o nagtatrabaho roon.

Pero hindi lang ang iligal na paninirahan at pagtatrabaho ang pinalalayas kundi pati ang mga may criminal record.

At patunay rito ang 24 Pinoy na dumating kamakailan sa Pinas dahil may ginagawang krimen umano ang mga ito.

Dahil dito, maaaring hindi lang 350,000 Pinoy ang mapalalayas kundi mas marami pa.

GUTOM DOON, GUTOM DITO

Alam ba ninyo ang biglaan ding dumadapo sa mga nangangambang mapalayas o ma-deport?

Gutom.

Ito’y dahil hindi na basta makalabas ang mga ito sa kanilang mga tinitirhan upang maghanapbuhay.

Napakarami umanong gumagalang ahente o tauhan ng Department of Homeland Security at Immigration and Customs Enforcement.

Kapag nakakita sila ng mga dayuhan, halimbawa sa mga kalsada, basta na lang umano nagtatanong ang mga ito kung may dala silang mga dokumento na patunay na ligal ang kanilang mga paninirahan doon.

Panay rin ang pagsusuri sa mga rekord ang nasabing mga ahensya at kung may masilip silang mga hindi kanais-nais na gawa ng mga dayuhan, nangre-raid ang mga ito kahit saan.

Pati mga pabrika at sakahan na karaniwang may maraming dayuhan nagtatrabaho kahit maliit lang ang sahod, pinupuntahan din ng mga ahente.

Kaya tago nang tago nang todo ngayon ang dati nang tago nang tago noon.

Saan nga ito patutungo kundi gutom?

Ang masama pa, dahil wala na silang pagkakitaan doon, wala na rin silang maipadadala o remittance sa Pinas.

Ano pa ang kasunod nito kundi gutom din sa mga Pinoy sa Pinas na umaasa sa kanilang mga remittance?

Pero hindi lang gutom, mga Bro, ang problema kundi paghinto o pagkaputol na napakaraming bagay.

Tiyak na may hihinto sa pag-aaral na mga bata at hulog o upa sa mga tinitirhan at may mapuputulan ng tubig at kuryente.

Paano pa kung may nagkasakit?

Hindi magaan ang mga problemang ito.

HAMON SA GOBYERNO

Malinaw na hindi umuubra ang mga payo sa mga iligal na Pinoy sa US na huwag silang mangamba dahil mabait umano ang Amerika sa mga Pilipino.

May magtatanggol din umano sa kanila na mga abogado, non-government organizations at iba pa.

Pero malinaw na hindi umubra ang mga ito batay sa kaso ng 24 Pinoy na biglang pinauwi sa Pinas.

Ano-ano na nga ba ang mga ginagawa ng pamahalaan sa rami ng posibleng palalayasin sa US at masamang epekto nito sa posibleng daang libo o milyong Pinoy sa Pilipinas?

Nagtatanong tayo dahil hindi nating maringgan, halimbawa, ang mga nakaupong senador at kongresman kung ano ang maitutulong nila sa Department of Foreign Affairs at Overseas Workers Welfare Administration na kumikilos na para sa mga Pinoy.