MARAHIL ay wala nang mas mabigat na batikos laban sa isang public utility kaysa marinig ang isang buong lungsod na nagsasabing, “Hindi na kayo tanggap dito.”
Iyan ang nangyari sa San Jose del Monte, Bulacan, kung saan nagpasa ang city council ng resolusyon na nagdedeklarang hindi kanais-nais ang PrimeWater Infrastructure Corp. matapos ang mga taon ng reklamo — matagal na pagkawala ng suplay ng tubig, lumalalang pasilidad, at sinasabing kapabayaan at kakulangan sa pakikipagtulungan.
Para sa kompanyang may tungkuling maghatid ng isa sa pinakapayak na pangangailangan ng buhay, hindi ito karaniwang pagsaway. Para itong ekskomunikasyon.
Umabot na sa hukuman ang alitan ng lokal na pamahalaan at PrimeWater. Dahil nasa ilalim ito ng sub judice, nararapat na ipaubaya sa hudikatura ang mga usaping ligal. Sapat nang sabihing umabot ang laban sa Las Piñas City, kung saan humingi ng lunas ang kompanya at pansamantalang nakakuha ng temporary restraining order.
Nagkataon lamang ba iyon? Oo, nakarehistro sa Las Piñas ang kompanya — at doon din matatagpuan ang mga Villar, na dating may-ari hanggang Disyembre ng nakaraang taon.
Gayunman, panandalian lang ang ginhawang iyon matapos tanggihan ng korte ang mas mahabang injunction. Sa huli, ang hudikatura ang magpapasya.
Ngunit hindi dapat maliitin ang galit ng publiko. Araw-araw na apektado ang mga pamilya sa Bulacan ng problema sa tubig, at walang sinoman ang may karapatang isantabi ito. Hindi basta winawakasan ng mga lungsod ang matagal nang kasunduan, naghahanap ng pansamantalang serbisyo, at humihiling ng imbestigasyon kung hindi seryosong nabasag ang tiwala.
Isang tanong kung mauuwi sa pananagutang ligal ang mga paratang. Iba namang usapin kung sapat na ang dinanas ng mga konsyumer upang mawalan ng tiwala.
May isa pang kapansin-pansing pangyayari: pinayagan ang PrimeWater na palitan ang pangalan nito bilang Hiraya Water Corp., kasabay ng pagtiyak na walang magbabago sa kanilang obligasyon, pananagutan, kasunduan, o responsibilidad.
Maaaring ito’y simpleng rebranding. Ngunit kung tiwala ng publiko ang pinakamahalagang puhunan ng isang kompanya, sapat ba ang bagong pangalan kung hindi maayos ang serbisyo?
Maaaring gumanda ang anyo sa papel ang bagong pagkakikilanlan, ngunit walang saysay ito kung hindi mapapabuti ang tubig na lumalabas sa gripo.
Mangyayari lamang ang tunay na pagbabago sa pamamagitan ng mas mataas na antas ng kakayahan at pananagutan. Sa huli, hindi pangalan ang sukatan kundi serbisyo.
Sa abot ng makakaya, binabati ng Firing Line ang magkabilang panig—at higit sa lahat, ang publikong kanilang pinaglilingkuran—ng mas maayos na hinaharap.
* * *
SHORT BURSTS. Para sa mga komento o reaksyon, mag-email sa [email protected] o mag-post sa @Side_View sa X app (dating Twitter).
