ANG ika-anim na klase ng breast cancer ay ang Paget’s disease na isa ring bihirang uri ng kanser na nagsisimula sa utong at kumakalat sa mas madilim na balat na nakapalibot dito na tinatawag na areola. Kaiba ito sa metabolic na sakit sa buto na Paget’s disease on the bone.
Karaniwan itong nangyayari sa mga taong higit sa 50 taong gulang. Karamihan sa mga may ganitong kondisyon ay may kasamang ductal breast cancer, na maaaring in situ (nasa orihinal na lugar) o, sa mas bihirang kaso, isang uri ng invasive breast cancer.
Ang Paget’s disease ng suso ay maaaring magdulot ng mga sintomas na madalas napagkakamalang simpleng iritasyon sa balat tulad ng dermatitis o iba pang hindi cancerous (benign) na kondisyon sa balat.
Kabilang sa mga palatandaan ang nagbabalat o nagiging kaliskis ang balat sa utong; pagtutuklap, paglabas ng likido, o tumitigas na balat na kahawig ng sa utong, areola, o parehas; pangangati; pamumula; pakiramdam ng “tingling” o pagkasunog; paglabas ng dugong likido mula sa utong; paglapad o pagbaligtad (inverted) ng utong; pagkakaroon ng bukol sa suso; at pagkapal ng balat sa bahagi ng suso.
Mahalagang komunsulta agad sa doktor kung may napapansing ganitong mga sintomas. Ang mga palatandaan at sintomas ng Paget’s disease ng suso ay karaniwang nararanasan sa isang suso lamang. Nagsisimula ito sa utong at maaaring kumalat sa areola at iba pang bahagi ng suso.
Maaaring magpabalik-balik ang mga pagbabago sa balat sa simula o tumugon pansamantala sa mga topical treatment, na tila nagpapagaling sa balat. Gayunpaman, sa karamihan ng mga kaso, ang mga sintomas ay tumatagal nang ilang buwan bago tuluyang ma-diagnose ang sakit.
Dahil dito, mahalagang maging mapagmatyag sa mga pagbabago sa balat ng suso at agad kumonsulta sa doktor upang masuri at matukoy kung may mas malalim na pinagmumulan ng mga sintomas.
Ang ika-pito ay ang RECURRENT BREAST CANCER. Uri ng kanser sa suso na bumabalik matapos ang unang paggamot. Kahit na ang layunin ng unang paggamot ay alisin ang lahat ng mga selulang may kanser, maaaring may ilang selula na nakatakas at hindi naalis. Ang mga hindi natukoy na selula ng kanser na ito ay maaaring dumami at magdulot ng muling paglitaw ng kanser.
Ang recurrent breast cancer ay maaaring bumalik makalipas ang ilang buwan o taon mula sa unang paggamot. Maaaring ito ay bumalik sa parehong lugar kung saan unang natagpuan ang kanser o ang local recurrence o kumalat sa ibang bahagi ng katawan o ang distant recurrence.
Mas mahirap harapin ang muling paglitaw ng kanser kaysa sa unang diagnosis, ngunit hindi ito nangangahulugang wala nang pag-asa. Ang paggamot ay maaaring alisin ang lokal o malawakang pagkalat ng recurrent breast cancer. Kahit na hindi ito tuluyang malunasan, ang paggamot ay makatutulong sa pagkontrol ng sakit sa mahabang panahon.
