ALAMINOS, PANGASINAN – Sa hangaring gawing mas komprehensibo ang serbisyong pangkalusugan para sa bawat Pilipino, nakiisa ang Philippine Health Insurance Corporation (PhilHealth) sa 61st Convention ng DOH National Association of Dentists (DHNAD) nitong Martes, ika-3 ng Marso 2026.
Sa harap ng mga dentista mula sa pampublikong sektor at komunidad, ibinahagi ni PhilHealth President and CEO Dr. Edwin M. Mercado ang bagong direksyon ng ahensya na nakatutok sa pagpapalakas ng preventive care.
Sentro ng talakayan ang pagpapalawig ng mga benepisyo sa ilalim ng PhilHealth YAKAP (Yaman ng Kalusugan Program). Ayon kay Dr. Mercado, isang batikang orthopedic surgeon at eksperto sa health economics, hindi lamang pisikal na karamdaman ang dapat pagtuunan ng pansin kundi pati na rin ang Preventive Oral Health Services.
Sa ilalim ng bagong direksyon ng PhilHealth ngayong 2026, layon ng ahensya na gawing bahagi ng primary care ang dental services upang masigurong ang bawat miyembro ay may akses sa regular na check-up, cleaning, at iba pang serbisyong pang-iwas sa sakit ng ngipin.
“Ang ating mithiin ay hindi lamang gamutin ang mga maysakit, kundi siguruhin na ang bawat Filipino ay manatiling malusog sa pamamagitan ng prevention,” pahayag ni Dr. Mercado.
“Sa bawat ngiting nagniningning sa tulong ng ating mga dentista, sama-sama nating naiaangat ang antas ng kalusugan sa bansa.”
Ang pakikipagtulungan ng PhilHealth sa DHNAD ay isang mahalagang hakbang upang mapag-isa ang pwersa ng mga government at community dentists. Sa pamamagitan ng PhilHealth YAKAP, mas pinadali na ang proseso ng pagpapakonsulta at pag-avail ng mga benepisyo sa mga accredited clinics sa buong bansa, kabilang na ang mga liblib na lugar.
Sa ilalim ng liderato ni Dr. Mercado, patuloy na binabago ng PhilHealth ang imahe nito tungo sa isang ahensyang mas “ka-yakap” ng pamilyang Pilipino.
Ang pagsasama ng oral health sa primary care ay bahagi ng mas malawak na adbokasya ng administrasyong Marcos para sa Universal Health Care (UHC), kung saan ang kalusugan ay kinikilala bilang isang batayang karapatan na dapat matamasa ng lahat, anoman ang katayuan sa buhay.
Sa pagtatapos ng kumbensyon, muling nanawagan ang PhilHealth sa mga miyembro nito na gamitin ang kanilang mga benepisyo at huwag mag-atubiling magpatingin sa kanilang mga YAKAP providers para sa isang mas malusog at masayang kinabukasan.
