MAS malaki na ang maaaring mahiram ng mga miyembro sa Pag-IBIG Fund Multi-Purpose Loan (MPL) at mas maikli na ang panahon upang mag-qualify, at mas maraming pagpipiliang repayment terms.
Sa ilalim ng mas pinagbuting Pag-IBIG MPL, maaari nang makahiram ang mga miyembro ng hanggang 90% ng kanilang kabuuang Pag-IBIG Regular Savings, mas mataas ng 12.5% kumpara sa dating 80%.
“Patuloy nating pinagaganda ang ating mga loan program upang lalong tugunan ang mga pangangailangan ng ating mga miyembro,” sabi ni Secretary Jose Rizalino L. Acuzar, Chairperson ng 11-member Pag-IBIG Fund Board of Trustees at pinuno ng Department of Human Settlements and Urban Development.
“Ang mga pagbabagong ito ay tugon sa direktiba ni Pangulong Marcos na gawing mas abot-kaya at accessible ang serbisyong pinansyal para sa kapwa natin Pilipino. Sa mas malaking loan at mas madaling eligibility ng Pag-IBIG MPL, mas marami tayong miyembrong matutulungan sa kanilang mga pangangailangan.”
Kabilang sa mga pagbabago sa Pag-IBIG MPL ang bagong one-year repayment term bilang dagdag na opsyon sa existing na two at three-year terms nito. Nagbibigay ito ng karagdagang flexibility para sa mga miyembro, upang lalong maiakma ang buwanang bayad sa loan sa kanilang financial capacity.
Binigyang-diin naman ni Pag- IBIG Fund Chief Executive Officer Marilene C. Acosta na sa gitna ng pagpapahusay ng MPL, nananatili pa rin itong abot-kaya dahil sa mababang monthly interest rate na 1.4583%. Dagdag pa niya, ang malaking bahagi ng interes na kinikita mula sa MPL repayments ay bumabalik din sa mga miyembro bilang dibidendo.
“Alam namin kung gaano kahalaga ang Pag-IBIG MPL para sa mga manggagawang Pilipino, dahil ito ay naaasahan nila bilang pambayad ng tuition fees, pampatayo ng maliit na negosyo, pambili ng gamot at pambayad ng medical bills, pagpapaayos ng bahay, at pambili ng kasangkapan at iba pang pangangailangan,” sabi ni Acosta.
Noong 2024 lamang, umabot sa mahigit 3.2 milyong miyembro ang nakapag-avail ng cash loans na nagkakahalaga ng P70.3 bilyon—ang pinakamataas na na-release ng Pag-IBIG Fund sa isang taon.
“Lubos na makaaasa ang ating mga miyembro sa patuloy naming pagpapabuti ng programang ito, gayundin ng iba pa naming mga programa at serbisyo, upang higit na makatulong sa kanilang paghahangad ng isang maayos at magandang buhay,” dagdag ni Acosta.