UMIIGTING ang batikos laban kay Senador Risa Hontiveros dahil sa patuloy nitong pagtutok sa mga isyu ng nakaraang administrasyon, sa halip na ituon ang pansin sa mga anomalya at umano’y pandarambong na naganap sa kasalukuyang panahon. Sa mata ng ilang sektor, nagmumukhang paulit-ulit ang pagbabalik sa mga kontrobersya noong 2016 hanggang 2022, habang sariwa at mas agarang mga kaso mula 2022 hanggang 2025 ang tila hindi nabibigyan ng parehong diin.
Itinuturing ng mga kritiko na ang walang humpay na pag-atake sa dating pamahalaan ay may bahid ng ideolohikal na motibo. Lumilitaw ang pananaw na ang ilang progresibong grupo ay hindi kailanman matanggap ang naging takbo ng pulitika at patuloy na ginagamit ang Senado bilang entablado upang buhayin ang mga laban ng nakaraan. Sa ganitong konteksto, binabanggit ang pagbagsak ng armadong kilusan at ang pagsuko ng ilang rebelde noong mga nagdaang taon bilang bahagi ng mas malawak na pagbabagong hindi sinang-ayunan ng ilang sektor sa kaliwa.
Gayunman, ang mas mahalagang usapin para sa publiko ay ang kasalukuyang kalagayan ng bansa. Sa panahon ng mataas na presyo ng bilihin, kakulangan ng trabaho, at patuloy na reklamo ng katiwalian, inaasahan ng taumbayan ang agarang aksyon laban sa mga responsable sa mga anomalya ngayon, hindi kahapon.
Ang pagtuon sa mga kaso mula 2022 hanggang 2025, at ang mabilis na pag-aresto sa mga sangkot ay nakikitang mas makabuluhang hakbang upang maibalik ang tiwala sa mga institusyon.
Hindi itinatanggi ng mga nagmamasid ang kahalagahan ng pananagutan sa nakaraan. Ngunit sa isang sistemang may limitadong oras at yaman, mahalaga ang wastong prayoridad. Ang patuloy na paghalukay sa lumang “sugat” nang walang kasabay na resolusyon sa kasalukuyang problema ay nagbubunga ng pagod at pagkadismaya sa publiko.
Sa huli, ang inaasahan ng mamamayan ay malinaw na resulta kung saan kailangang mapanagot ang mga tiwaling opisyal, maibalik pondo ng bayan kasama ang hustisyang nararamdaman sa kasalukuyan.
Ang tunay na pamumuno ay nasusukat hindi sa dami ng binubungkal na isyu sa nakaraan, kundi sa bilis at tapang ng aksyon laban sa mga salarin ngayon.
