NOONG Abril, bago ang halalan, napabalita na tuloy na ang ‘demolisyon’ ng makasaysayang ‘Philippine Village Hotel’ na malapit sa Ninoy Aquino International Airport at ‘premier hotel’ ng mas malawak na ‘Nayong Pilipino Complex.’
Sa pag-alis ng mga Marcos noong 1986, sadyang pinabayaan ng gobyerno ang PVH at Nayong Pilipino dahilan para ito malugi, ma-bankrupt at tuluyang magsara.
Ayon kay ex-Bureau of Customs Commissioner Lito Alvarez, na ‘general manager’ ngayon ng ‘New NAIA Infrastructure Corporation’ ni ‘RSA’ (Ramon S. Ang), magsisimula ang demolisyon sa Abril 21. Sa lokasyon naman nito itatayo ang ‘NAIA Terminal 5.’
Nagtatanong naman ang mga miron kung “nasa ayos” ba ang mga “dokumento” patungkol sa demolisyon at sa buong transaksyon? Wala raw kasing “karatula” o ‘public notice’ kung “sino” ang nanalong kontraktor?
Ipinunto pa ng mga miron na “daang milyones” (daw) ang “utang” ng PVH sa ‘Pasay LGU’ at sa ‘GSIS’ kaya malinaw na malaki ang interes dito ng gobyerno.
Kung malaki ang utang sa Pasay LGU, ano kaya ang “usapan” kapalit ng ‘demolition permit’ at iba pang rekositos na galing sa LGU?
Malaking kontrata ang paggiba ng PVH at dahil may interes ang gobyerno, dumaan pa ba sa ‘public bidding na mandato ng RA 9184? Sino-sino ang mga lumahok? Sino ang “nanalo?”
Hmm. Ano kaya ang opinyon dito ni Ombudsman Samuel Martires na hinangaan matapos pumayag sampahan ng kaso ang ilang opisyal ng gobyerno sa nangyaring ‘deportation’ ni ex-Presidente Rodrigo Roa Duterte.
Baka “gusto” mong “ipabusisi” ito, “Bosing,” eh, magandang inisyatiba ‘yan!
Dahil pangalan at reputasyon naman ni RSA ang “nakapusta” rito sa NNIC at sa mga proyekto nito, gusto nating maniwala na “nasa ayos lahat ang dokumento,” tama ba, mga kabayan? Harinawa.
Abangan!
